Tuir observasaun www.tempotimor.com iha terenu nota katak, udan udan no anin boot ne'e la'ós hamosu inundasaun de'it, maibé estraga mós uma komunidade sira ne'ebé hela iha mota ninin inklui lori mós transporte balun.

Liga ba situasaun ne'e xefe suku Manleuana, Jacob Tilman Soares hatete, sira labele halo buat ida, tanba ne'e forsa husi natureza.

"Agora ne'e ita ko'alia ladi'ak, tanba ne'e natureza ne'e, agora ita atu husu apoiu mós se mak atu fó apoiu agora. Kona-ba estrada agora kotu ne'e ita liga ona ba Diretór Jerál Obras Públika nian atu lori pezadu mai para evakua ema de'it tanba agora ita labele halo buat ida”, dehan Xefe suku Jacob Tilman ba www.tempotimor.com iha Komoro mota ulun, domingu (04/04).

Xefe suku mós dehan, populasaun sira ne'ebé hela besik mota ne'e hola parte ba aldeia tolu, maibé uma-ka'in hira seidauk klaru.

"Uma-ka'in hira ne'e ha'u ladun hatene, tanba ne'e aldeia tolu mak hela iha ne'e, Lisibutak, Lemocari no Badiac. Entaun ami mós prepara ona fatin para evakua ema sira ne'e”, dehan nia.

Entretantu informasaun seluk ne'ebé www.tempotimor.com asesu katak, korente mote ne'e konsege lori familia uma-ka'in hamutuk na'in-7 ne'ebé molok ne'e hela iha mota ninin.

Alende husi informasaun ne'e, mota mós lori karreta baskolante 4 motorizada balun inklui uma sira ne'ebé hari’i iha mota ninin mota dasa moos kedan.(*)