Husi rezultadu inundasaun ne'e mak komunidade uma-ka'in kuaze 200 evakua ona ba salaun Dom Bosco Comoro, tanba laiha fatin hodi hela.
Liga ba situasau ne'e Diretór Eskolár Dom Bosco Comoro, Pe. Adriano Maria de Jesus katak, fatin ne'ebé Dom Bosco iha hodi oferese ba vítima sira mak fatin Gim nian de'it.
"Fatin ne'ebé ami iha mak Gim ne'e, hanesan ita-boot haree dadaub, ida ne'e mak ami bele oferese ba vítima inundasaun nian husi hodikalan to'o ohin," dehan Pe. Adriano ba www.tempotimor.com iha Dom Bosco, Domingu (4/4).
Diretór ne'e mós dehan, totál komunidade hira mak iha ona fatin refere, maibé labarik mak barak liu.
"Ema hira ha'u seidauk hatene, maibé maibé ita haree katak labarik mak barak liu. Inan-aman sira sei hadi'a hela sira-nia sasan ne'ebé horsida kalan mak mai, ne'ebé horsida sira mai ne'e ho sira-nia xefe aldeia no koordenadór sira. Maibé agora ami hahú rejistu ona sira-nia naran tuir uma-kain ida-idak," dehan Nia.
Padre ne'e mós dehan, bainhira komunidade sira evakua mai fatin refere husi parte governu no Kruz Vermella mós mai haree ona hodi apoiu lona. Depois kona-ba hahan parte Dom Bosco sei koordena hela ho governu para lori hahan mai.
"Maibé ohin meudia ami Dom Bosco rasik prepara hahan tuir buat ne'ebé ami iha, ne'ebé sira ne'ebé mai uluk hetan ona mezmu la'ós barak liu, maibé hotu-hotu hetan ona hahan," dehan Nia.
Padre ne'e mós akresenta, labarik ki'ik de'it liu 100 no bebe ne'ebé ki'ik liu ho inan-aman refuziu mai salaun Dom Bosco ne'e mak fulan ida.
Iha fatin hanesan vítima ba inundasaun Domingas Henriqueta husi aldeia Goglota katak, kondisaun uma di'ak, maibé sasan hotu iha uma laran la aproveita tanba ne'e nakonu.
"Uma di'ak, maibé sasan hotu iha uma laran, kios nian mak la aproveita, ami-nia roupa mós aat hotu, ami mai mak hanesan ne'e de'it, hahan mós laiha, roupa hodi troka mós laiha, entaun ami mai hanesan ne'e de'it, ami hamutuk na'in 10," dehan vítima Domingas.
Alende ne'e www.tempotimor.com mós observa katak komunidade ne'ebé hetan ona rejistu hamutuk uma-ka'in 173, maibé komunidade sira kontinua forma hodi halo rejistu.
Entretantu, dadaun ne'e komunidade ne'ebé sai vítima ba inundasaun ne'e hetan ona apoiu husi OXFAM hanesan biscuit, supermi no hahan seluk tan inklui parte saúde mós apoiu máskara ba vítima sira hodi uza tanba situasaun Covid-19 hela.(*)