Print this page

Inundasaun iha Díli, Mota Hamate Ema Kuaze Na’in Neen

Tempotimor (Díli) - Udan boot iha Kapitál Dili hahú husi loron sábadu to’o domingu (03-04/04) konsege hamosu inundasaun iha Kapitál Dili hamate kuaze ema na’in-neen inklui Membru Batallaun Orden Publiku (BOP), tanba bee mota ne’ebé lori.

Dezastre natural ne’ebé mosu kuaze loron ida nia laran hamosu inundasaun iha Dili laran no mate komunidade balun inklui mós bee tama komunidade nia uma halo balun lakon hela fatin.

Tuir informasaun ne’ebé www.tempotikor.com rekolla katak, Membru BOP ne’ebé mota lori husi Maloa la konsege salva-an tanba korente mota nia maka’as no lori to’o iha mota ain, Aitarak Laran ho kondisaun mate.

BOP ne’e hakotu i’is iha mota laran hafoin komunidade sira iha área Aitarak Laran hetan. No ekipa ida husi parte apoia evakua kedan mate isin ba Hospital Nasional Guido Valadares (HNGV).

Aliende ne’e, família ida iha área Beduku la konsege salva-an tanba mota boot ne’ebé hamosu inundasaun hakotu sira-nia moris. Família ida ne’e iha ema na’in-lima, labarik ki’ik na’in-tolu no ema boot na’in-2.

Maske iha na’in tolu ne’ebé konsege hetan ona mak labarik na’in-ida, ema boot na’in-rua no labarik na’in-rua ne’ebé seidauk hetan to’o agora.

Haree ba udan boot husi loron sábadu to’o domingu (03 to’o 04/04) tinan 2021 konsege hamosu inundasaun maka’as iha Kapitál Dili halo komunidade barak mak lakon hela fatin tanba bee ne’ebé tama sira-nia uma laran no balun hetan sobu husi anin boot.

Tuir observasaun husi www.tempotimor.com iha terenu nota katak, bee mota ne’ebé sai husi Ponte Maloa konsege tama to’o área Palásiu Prezidensial inklui mós estrada iha área refere to’o área Kampung a
Alor, edifisiu SAMES ninia.

Husi Inundasaun kapitál Dili haree ba estrada diresaun Embaixada Japaun no Embaixada Xina-Praia dos Coqueiros bee Nakonu no laiha transporte ida ne’ebé bele liu.

Iha parte terminal Bekora ne’ebé bee tama komunidade sira-nia uma, tanba Mota lori aí-hun boot hodi hatan ponte rerefete.

Iha parte seluk korente bee ne’ebé boot konsege hakotu Ponte Perumnas. Nune’e mós iha parte Bidau bee sa’e kuaze metru ida. Akontesimnetu hanesan mós iha parte Rai Kotu, nomós área Laboratóriu Nasionál ninian.(*)

Rate this item
(2 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com