Pasiénte ne'e hela permanente iha sede Foront Traballadór Maubere Farol hamutuk ninia kolega na'in-11, nune'e pesoál saúde mós hasai hotu ona sira nia sampel hodi bá halo teste SWAB.

Rusli Bin Ali nu'udár responsável vijilansia epidemolojia Munisípiu Dili informa, prezensa pesoál saúde iha fatin ne'e, atu evakua pasiénte moras Covid-19 feto ida iha ne'e ba iha sala izolamentu.

"Ami servisu konjuntu, husi servisu saúde Munisípiu Dili hamutuk ho ekipa nasionál vijilánsia, nomós ho servisu saúde Vera Cruz, ami mai halo investigasaun bá kazu ne'ebé mak pozitivu iha Suku Motael, Aldeia Liro, Postu-administrativu Vera Cruz, ami halo investigasaun hotu ona atu evakua pasiénte ba izolamentu Vera Cruz”, dehan pesoál saúde ne'e iha fatin evakuasaun bá pasiénte iha Farol, kinta (18/03).

Pasiénte refere ninia istória kontaktu husi ne'ebé seidauk hatene klaru, maibé tuir informasaun nia kontaktu ho ema husi Munisípiu Vikeke.

Pasiénte ne'e pesoál saúde agora kedan evakua bá sala izolamentu hodi hetan asisténsia maximu.

"Pasiénte ida ohin ne'e sexu femenina, ha'u labele temi naran, tanba konfidensia, nia agora prepara hela nia sasán, no ambulánsia nasionál sei mai foti nia atu lori bá fatin izolamentu ne'ebé mak determina tiha ona husi Ministériu Saúde”, akresenta nia.

Iha fatin evakuasaun pasiénte refere, hetan assisténsia maximu husi parte seguransa Polísia Nasionál Timor-Leste (PNTL). (*)