Segundu Komandante PNTL Dili, Superintende Polísia Euclides da Costa Belo esplika, objetivu prezensa komandu PNTL munisípiu Dili iha merkadu Taibessi, primeiru atu vizita pesoál seguransa sira ne’ebé asegura hela situasaun iha Merkadu, hamutuk ho husi ekipa jestaun merkadu hodi fahe máskra ba sira.
Máskra ne'ebé fahe ba ekipa rua ne'e, mak face protection, maske minímu, maibé tanba sira loroloron iha kampu, nunee tenke fahe ba sira hodi asegura-an.
"Embora ami mós fahe ba ita-nia vendedór sira, vizitór sira mai iha merkadu mak laiha, depois duni fila, fó máskra ba sira mak sira bele ba hola modo, ho sasán ne'ebé mak nesesidade báziku, liuliu vendedór sira ne'ebé mak iha merkadu laran fahe máskra ba sira”, dehan nia ba jornalísta sira iha merkadu munisipal Taibessi, kuarta (17/03).
Asaun ne'ebé sira halo, la'ós PNTL mesak, maibé hamutuk ho grupu Mama-bolu, Movimentu Tasi-moos, reprezentante komunidade 40, hamutuk hodi realiza halo asaun ne'e.
Apoiu ne’ebé sira halo ne'e, la haree ba folin, maibé haree asaun umanidade ba ema hothotu atubele hadeer hodi kombate hamutuk hasoru Covid-19.
"Ohin máskra ne'ebé ami fahe ne'e, kuaze 1500 itál mak ami fahe ba ita-nia komunidade sira ne'ebé mak fa'an modo iha merkadu laran, labarik, ferik katuas, foinsa'e sira, motorista sira ne'ebé mai iha ne'e, inklui mós ami-nia kolega sira husi guarda jestaun merkadu nian ne'ebé mak iha ne'e”, haktenik nia.
Máskra ne'ebé distribui ba komunidade no vendedór sira ne'e, apoiu husi Ministériu Interior (MI), Asosiasaun Xineza iha TL hodi fahe tutan ba komunidade sira.
Atividade umanitáriu sei kontinua distribui ba vendedor sira iha merkadu Manleuana inklui fatin seluk.(*)