Loron tersa (16/03/2021) dader, komúnidade lubuk boot ida ba halo protestu iha SS-SIJK, tanba konsidera serka sánitaria, la fó espasu atu buka moris.

Iha mós estudante balun ne'ebé ba ezije SIJK ho razaun sira hela iha Kost laiha ona hahán hodi tahan to'o loron 02 fulan-abríl tinan 2021 bainhira serka sánitaria iha Dili remata, nune'e sira husu atu loke dalan movimentu bá Munisípiu sira atubele ba foti hahán.

Asaun protestu ne'e, komúnidade feto ida hakilar ho lian maka’as ba autóridade seguransane'ebé hamrik hela iha portaun Centru Konvensoins Dili (CCD) nian parte leste, nian hodi dehan, atu prepara sasán prevensaun Covid-19 nian ne'e di'ak hela, importante loke dalan.

"Imi ne'e fulafulan simu osan be di'ak, be kasian, imi halo ida ne'e la haree los bá komúnidade, haree ba imi nia-an de'it, tur iha ne'ebá la haree ba ema nia sofrementu”, Nia husu ba SIJK iha Sentru Konvensoins Dili (CCD), merkadu lama, tersa (16/03).

Ho emosaun katak, kona-bá prepara máskra, parte komúnidade prontu, maibé husu mak loke dalan hodi buka moris.

"Maskra ne'e ami bele sosa dos ida rua tau iha karreta laran, impóortante loke dalan”, haktenik nia.

Komúnidade mane ida mós ezije ba jestor SIJK nia razaun kona-bá, iha rai laran la loke dalan, maibé Ró ho Aviaun tama mai di'ak hela.

"Ró ho Aviaun tama fali ne'e saida, diskriminasaun bá populasaun", nia hakilar ba SIJK.

Iha situasaun ne'e, parte seguransa PNTL to'o kedan iha CCD hodi halo atuasaun tanba laiha regra distansia sosiál, nune'e komúnidade barak halai tanba tauk seguransa nia prezensa.

Tuir rezolusaun governu nian númeru 12/2021, loron 8 fulan-marsu tinan 2021 ne'ebé impoin serka sánitaria iha Munisípiu Dili sei remata iha loron 02 fulan-abríl tinan 2021. (*)