Koordenadór Forsa-Tarefa bá Prevensaun no Mitigasaun Surtu Covid-19 iha Timor-Leste, Rui Maria de Araújo informa, husi progresu atividade prevensaun no mitigasaun surtu Covid-19 iha munisipiu Dili, ekipa saúde sira deteta tan kazu pozitivu 6.

"Husi horseik mai ohin husi amostra ne'ebé rekolla iha Munisípiu Dili durante atividade buka tuir kontaktu besik iha tan kazu pozitivu na'in-6”, informa Rui liuhusi konferénsia Imprénsa iha Sala Situasaun Sentru Integradu Jestaun Krízi (SS-SIJK), sábadu (12/03).

Husi pozitivu ne'e, kazu pozitivu 2 husi aldeia Loron matan, Suku Madohi, sira hetan pozitivu, tanba hetan kontaktu besik ho sira-nia família uma-laran ne'ebéanúnsia ona iha loron hirak liuba.

Kazu pozitivu 2, profisionál saúde ne'ebé halo formasaun iha Hospital Nasional Guido Valadares (HNGV), sira-na-in-rua kontatu besik ho profisionál saúde ida ne'ebé mós halo formasaun hanesan iha ospital nasionál, ne'ebé anúnsia ona iha loron 10 fulan-marsu tinan 2021.

Tuir mai kazu pozitivu 1, ne'e rezultadu husi restreiu aleatóriu ne'ebé halo iha aldeia Terra Santa, Suku Madohi, postu administrativu Dom Aleixu.

Nune’e mós kazu 1 iha munisípiu Dili, ho idade tinan 1 fulan 8, ne'ebé ekipa saúde sira deteta iha fatin izolamentu hamutuk ho nia inan, tanba labele husik hela nia mesak.

Oanmane ne’e ho nian tama iha izolamentu husi kuarantena iha Batugade, momentu sira tama liuhusi fronteira, hafoin teste no nia inan pozitivu.

"Ho nune'e, kazu ne'ebé detetadu pozitivu iha Munisípiu Dili, husi dia 7 marsu to'o ohin 13 hamutuk hotu 53”, deklara Rui.

Baze ba informasaun ne'ebé ekipa konjunta MInistériu Saúde nian rekolla, foti (agrupamentu) ka cluste kazu pozitivu iha Dili, laiha mudansa, iha de'it mudansa naran balu kona-ba suku, aldeia ne'ebé presiza ajusta.(*)