Komandante Unidade Polísia Marítima (UPM), Superintendente Polísia Basílio de Jesus, informa relasiona ho implementasaun konfinamentu obrigatóriu iha kapitál Dili la impede movimentu Ró ba mai entre Dili ho Ataúro, maibé nafatin kumpri regra sira-ne'ebé hasai ona husi Ministériu Saúde (MS) no Organizasaun Mundiál Saúde (OMS).
“Autoriza movimentu via marítima entre Dili ba Ataúro, maibé nafatin halo prevensaun no atensaun ba regra sira-ne'ebé maka iha, tenke uza maskára no distansiamentu iha Ró laran husi Dili ba Atauro,” dehan nia ba jornalísta sira iha nia kna'ar-fatin, Lecidere, kuarta (10/03).
Nia dehan, to'o oras ne'e husi parte UPM rasik seidauk iha orden ida husi komandu atu taka via marítima husi munisípiu Dili ba Ataúro, no laiha kompeténsia atu bele taka dalan sidadaun sira-nia movimentu, tanba ne'e movimentu via marítima ne'e kontinua hala'o nia operasaun hanesan bainbain.
Nia haktuir, dezde loron tersa (09/03) governu hasai desizaun hodi halo lockdown iha kapitál Dili, parte Unidade Polísia Marítima ne'ebé hanesan ajente seguransa nasaun nian, nafatin buka esforsu asegura no halo prevensaun ba moras surtu Covid-19, liuliu asegura movimentasaun transporte marítima ne'ebé hala'o operasaun ba no mai Ataúro.
“Horseik Ró lubuk ida mak husi Dili ba Ataúro, tanba ne'e parte marítima mós orienta ona ró sirane'e nune’e hodi evita, no ko’alia kona-ba distansiamentu sosiál,” dehan nia.
Nia informa, durante ne'e ró ne'ebé halo operasaun, tula pasajeiru sira liu kapasidade, balu to'o 20 no 30-resin, maibé tanba autoridade marítima la autoriza, nune'e métade husi ema na’in-10 no másimu na’in-15.(*)