Tasi Tolu mak fatin ida ne’ebe besik liu bairru BTN II, aldeia Terra Santa, Suku Madohi, Postu Administrativu Dom Aleixo.

Timoroan feto ida ne’ebe pozitivu Covid-19 iha loron hirak liu ba, hela iha BTN II no fatin ne’e mak halo ema barak trauma, lakohi besik, no tanba fatin nee mak ohin loron tama ona loron daruak lockdown iha munisipiu Dili.

Iha terrenu, jornalista observa katak, atividade iha besik fatin nee la’o hanesan baibain, maski movimentu ladun iha, maibe loja sira loke hanesan baibain hodi simu ema sira neebe iha nesesidade.

 

 Joven ida tuur hola anin besik tasi ibun iha Tasi tolu, Kuarta (10/3)

 

Foos folin sa’e

www.tempotimor.com koko halo entrevista ba na’in ba loja iha area Tasi Tolu, kona-ba folin foos atual, ho marka oioin hanesan kuda ulun, manu victoria, no seluk ne’ebe antes ne’e ho kilograma 25 $13.50, oras ne’e sa’e ba $14.

“Foos agora hotuhotu folin sa’e tanba Covid-19 ne’e maun.” na’in ba loja hateten.   

Alende ne’e, negosiante abulante sira mos idaidak kontinua tuur iha estrada ninin hodi hein sira nia roda tolu, maibe balun taka metin, balun deit mak loke, tanba movimentu ema nian menus liu kompara ho loron sira antes.

“Horseik la loke, ohin mak foin loke maibe ema la sosa, tanba ema mak laiha duni,” na’in ba tiga roda ida hateten ba jornalista www.tempotimor.com.

 Negosiante ne'ebe serku husi saka fo'os iha cerka sanitaria iha Tasi Tolu, Kuarta (10/3)

 

Polisia Taka Dalan

Iha Estatutua Sao Joao Paulo II nia okos, estrada taka, no membru Polisia Nasional Timor Lorosae hala’o nafatin sira nia servisu hodi kontrola movimentu transaporte husi Dili ba Likisa, Ermera no Maliana.

Bainhira www.tempotimor.com to’o iha fatin nee, Karreta Membru Parlamentu Nasional nian ida ho Xapa Matrikula mean, hakat sai husi Dili.

Jornalista www.tempotimor.com koko dadalia ho membru PNTL ne’ebe autoriza karreta ho xapa matrikula mean nee sai husi territoriu Dilli nian, dehan, polisia autoriza bele sai husi Dili maibe importante mak tenke iha guia de marca.

 

Kareta membru parlamentu ida iha auto stop iha ne'ebe husu licensa ba pesoal seguransa hodi nune'e konsege sai husi Teritoriu Dili nian, kuarta (10/3)

 

“Bele sai, maibe, tenke iha guia de marcha.” pessoal seguransa ne’e hateten ba jornalista www.tempotimor.com.

Iha estrada ninin mos karreta kompanhia nian lubuk ida ne’ebe forma hela atu sai husi territoriu Dili nian, no polisia halo daudaun pasa revista.

Husi parte Tasi ibun, jornalista  mos observa katak, iha ema lubuk ida ne’ebe halai ba mai iha tasi ibun, karik ema sira ne’ebe baibain gosta halo jinastika.

“Ami halai par hatun isin, ami usa nafatin masker. Tanba ami baibain halai iha tasi ibun nee, naran katak ita labele halibur malu iha fatin ida,” Delcia laos naran loloos hateten ba www.tempotimor.com.

 

Enjoy iha Ai-hun

 

jovens sira tuur iha lona okos ho tua sabu aqua kiik ida iha tasi tolu iha momentu serka sanitaria, kuarta (10/3)

 

Bainhira jornalista www.tempotimor halo observasaun besik iha area uma adat nian, iha ai-hun okos, iha joven na’in neen mak tuur iha barraka oan haleu hela tua sabu ho aqua kiik ida no sira sente animadu tebes (enjoy los). Nota katak joven ida bandar tua sabu ne'e.

Sira enjoy tanba hamaluk aan ho tua sabu ne’e. “Boa tarde maun,” sira komprimenta ema hirak neebe liu ba mai.

 

Area BTN II izoladu

Liuron BTN 2 ne'ebe saudades ba nia emar sira, Kuarta 910/3) 

 

Bainhira haree besik Area BTN II, situasaun izoladu tebes no hakmatek tanba laiha movimentu ema.

BTN ne’e hanesan fatin neebe antes nee Sala Situasaun Sentru Integradu Jestaun Krize detekta feto Timoroan ida iha area ne’e no oras nee numeru pozitivu COVID-19 husi bairru nee aumenta ona ba na’in ualu. 

 

Obralan iha Bairru BTN II nia sorin Loke nafatin

Obralan ho komprador iha tasi tolu,kuarta 910/3)

Negosiante sira ne'ebe faan obralan no faan modo tahan besik bairru BTN II Tasi Tolu kontinua atividade hanesan baibain, maski kuaze oras ida to'o oras ida resin mak vizitante ida mosu iha neeba, maibe sira kontinua hala'o atividade hanesan baibain.

Iha observasaun jornalista haree katak, maski ema barak paniku ho situasaun atual, liuliu peste siak neebe numeru pozitivu kontinua aas, maibe iha negosiante balun la preokupa atu uza maskara. Sira preokupa liu oinsa faan sira nia sasan iha tempu serka sanitaria ne'e.

Negosiante ambulante iha liuron ninin Tasi Tolu, Kuarta (10/3)