Hafoin Dili iha kazu pozitivu Covid-19, governu fó-sai ona rezulusaun númeru 12/2021 hodi inplementa serka sanitária ba Munisipiu Dili.
Iha rezulusaun refere aprova mós limita movimentu sai hosi uma bainhira laiha nesesidade inklui atividade ekonomia.
Nune'e Koordenador Jestor Merkadu Taibesi, António Manuel de Araújo kumpri no halo tuir liuliu rezulusaun refere hodi inplementa iha Merkadu Taibesi hanesan halo intervensaun másimu, liuliu kontrola regra prevensaun Covid-19 nune'e moras ne'e labele hadaet ba ema seluk.
"Iha-ne'e ha'u halo intervensaun hanesan halo kloot distansiamentu sosiál, ha'u tenke alikan karreta ne'ebé tama-sai hosi arah ida, portaun ne'ebé tama merkadu tenke halo kloot para distánsia no labele rame liu," dehan nia iha Taibesi, Dili, tersa (09/03).
Nia aviza ba vendedór ne'ebé sei iha Merkadu Taibessi bainhira la konsege ba sira-nia uma iha Munisípiu, atu konsidera nomoos halo intervensaun hanesan kumpri distansiamentu sosiál mínimu metru ida, tenki fase liman no uza maskára.
António hatutan, mesmu nune'e iha vendedór no komprador balun ne'ebé mak seidauk kumpri regra maibé hanesan ema umanu presiza konsidera no fó atensaun relasiona ho medida prevensaun.
Tuir observasaun www.tempotimor.com iha área merkadu Taibesi situasaun aktividade ekonomia la hanesan loron bainbain, hahú menus movimentu no dalan asesu tama ba merkadu-laran taka hosi parte leste, no autoriza de'it transporte, vendedór no komprador sira tama hosi portaun oin.(*)