Xefi Aldeia Terus-Na'in, Paulina Sarmento Barros halerik, katak dfikuldade boot ne’ebé komunidade hasoru mak bee-moos no estrada, tanba bee-moos ne'ebé durante ne’e uza, kanaliza husi mota ne'ebé merak, inklui estrada kontinua aat iha tempu udan, rezultadu mota Maloa tun halo estraga totál.

"Hanesan preokupasaun boot ba komunidade iha ne'e mak estrada. Bainhira tempu udan, komunidade aldeia Terus-Na'in labele asesu ba iha estrada,tanba dalan mak mota", Xefi Aldeia Terus-Na'in hateten ba jornalista iha nia rezidénsia, Mota ulun Maloa, Sesta (08/01).

Kona-ba bee-moos, nia dehan, bainhira tempu udan, sira labele hetan bee-moos tanba bee ne'ebé daudaun sira uza, kanaliza husi Mota mak distribui fila-fali ba sira hodi uza ba konsumu.

"Kuandu mota la'o hela, iha ne'e tenke hemu bee-merak. Só bainhira udan para ona, bee foin mós no komunidade bele uza. Maibé sé mota boot, ninia merak ne'e dala-ruma to'o loron ida ou rua, depois mak nia foin mós fali hodi komunidade bele uza", nia preukupa.

Totál populasaun iha aldeia Terus-Na'in hamutuk 2.293, kompostu husi mane hamutuk 1.178, no feto hamutuk 1.115.(*)