Print this page

Abílio Mausoko sai PA Munisípiu Dili Seidauk Serteza

By January 08, 2021 4955
Ministru Administrasaun Estatál (MAE), Miguel Pereira de Carvalho  Ko'alia ba Jornalista sira hafoin sorumutuk ho PM Taur Matan Ruak iha Palasiu Governu Dili Ministru Administrasaun Estatál (MAE), Miguel Pereira de Carvalho Ko'alia ba Jornalista sira hafoin sorumutuk ho PM Taur Matan Ruak iha Palasiu Governu Dili Foto Tempo Timor

Tempotimor (Dili)- Juventude rezisténsia Abílio Mesquita "Mausoko" kompete hotu prosesu rekrutamentu ba Prezidente Autoridade Munisipal Dili, maibé seidauk serteza tanba sei iha prosesu rekrutamentu.

Ministru Administrasaun Estatál (MAE), Miguel Pereira de Carvalho konsidera informasaun ne'ebé daudaun espalla ona iha mídia sosiál katak, Abílio "Mausoko" mak ba asumi kargu Prezidente Autoridade Munisipál Dili ne'e laloos.

"Informasaun ne'ebé mak sai iha públiku ita boot sira rona ne'e infelizmente sidauk loos, ne'e la loos, infelizmente ne'e laloos, loloos maka katak komisaun de juri de rekrutamentu ba administradór no Prezidente Autoridade sira iha hela prosesu de rekrutamentu, iha hela faze rekrutamentu," Nia dehan hafoin sorumutu ho Primeiru Ministru Taur Matan Ruak, iha Palásiu Governu, sesta (08/01).

Nia esplika, espesifikamente ba autoridade munisipál Dili nian, nia prosesu ne'e hahú no fó-sai avizu ba kandidatu sira atu hatama sira- nia kandidatura iha kedan períodu ida dezembru tinan kotuk nia laran, agora komisaun de juri iha ona faze ida atu fó-sai lista definitiva ba kandidatu sira-ne'ebé maka elizível para atu mai tuir prova eskrita.

"Dili nian mós agora iha faze ida agora daudaun, purtantu iha kandidatu lubun boot ida elizível para atu ba tuir prova eskrita ne'ebé mak provavelmente bele halo iha fin de fulan ida-ne'e ou bele mós iha inísiu de fevereiru fulan oin," Nia informa

Nia hatutan, bainhira remata sei kontinua ho prosesu tuir mai ne'ebe komisaun espesializada sei haruka fali ba munisípiu sira, nune'e konsellu konsultivu munisipañál pronunsia kandidatu aprovadu sira.

"Nomos apresiasaun ne'e sei halo mós iha grupu traballu tékniku interministeril ba desentralizasaun ne'e, wainhira prosesu ne'e halo hotu komisaun de juri sei aprezenta mai Ministeriu Administrasaun Estatál no lori ba Konsellu Ministru para liuhusi rezolusaun governu ida, konsellu ministru delibera sé mak sei sai Prezidente Autoridade Munisipál ba munisípiu Dili rasik nomos munisípiu haat seluk ne'ebé mak iha hela faze rekrutamentu, hanesan Bobonaro, Likisá, Ermera nomoos Manatuto, purtantu iha hela faze rekrutamentu, ha'u hanoin informasaun ne'e sidauk loos", tenik nia.

Nia la fiksa didi'ak ema na'in hira mak kompete ba Prezidente Autoridade Munisipál Dili nian, maibé komisaun de juri sei taka sai lista definitiva kandidatu sira-ne'ebé atu mai tuir prova eskrita.

"Iha lista ne'e karik inklui mos señor Abílio Mausoko nia naran? Ha'u labele komfirma ida-ne'e tanba ne'e juri mak informa, kuandu juri taka sai ona nia lista, mak ita boot sira bele haree mak bele dehan katak, naran iha ka lae", nia informa

Nia hatutan, maske mosu lista eskluidu, maibé ne'e depois sei fó prazu ba kandidatu sira iha loron 5 nia laran atu aprezenta reklamasaun, karik la konkorda.(*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com