"Karik iha komunidade ne'ebé la uza maskra, la halo distansiamentu sosiál, tama iha loja sira la fase-liman ho sabaun, maka PNTL sei foti asaun hasoru ema refere no prosesa ba iha Ministéru Públiku," dehan Gaspar bainhira halo sensibilizasaun Covid-19 iha área Audian Dili, Kinta (7/01).
Líder Munisípiu Dili ne'e husu atu komunidade sir kumpri dekretu governu númeru 21/2020 ne'ebé relasiona ho prevensaun no kombate Covid-19.
Alende ne'e, Gaspar mós husu komunidade atu tau atensaun mós ba moras dengue ne'ebé rezulta ema mate iha tinan kotuk.
Iha fatin hanesan Segundu Komandante PNTL Munisípiu Dili, Superintendente Asistente Polísia, Euclides Belo reforsa liu tan, polísia prontu ezekuta dekretu governu númeru 21/2020 bainhira komunidade balun kontra hanesan la uza maskára ka sein kumpri distansiamentu sosiál.
"Dekretu governu númeru 21 ne'e maka, artigu 13 mensiona kona-ba sidadaun sira ne'ebé la kumpri, regalias, kontra orden sira-ne'ebé anusiadu husi autoridade kompetente mak sira la kumpri bele kriminaliza sira," dehan Euclides.
Euclides esplika dekretu governu 21/2020 artigu 21 hateten, responsáblidade kriminál ba sidadaun ne'ebé la obedese ba regra refere.
"Tanba ne'e mak Komandu PNTL Munisípiu Dili prontu kuandu ekipa ne'ebé hala'o servisu iha terrenu kaptura ema pesoál ka grupu ne'ebé la kumpri regra estadu emerjénsia maka lori mai ita bele prosesu sira hodi kanaliza informasaun sira ba Ministeiru Públiku," dehan Euclides.
Entertantu dekretu governu númeru 21/2020 aprova liuhusi Konsellu Kinistru hanesan parte prevensaun no kombate pandemia Covid-19.
Iha dekretu refere hatete evita atu halibur malu liu na'in 10, uza maskára, kria distansiamentu sosiál. (*)