Tuir Komandante PNTL Munisípiu Dili Superentendente xefe Henrique da Costa, insidente sira ne'ebé mosu, polísia ne'ebé halo patrollamentu responde ho imediatu entaun buat hotu la'o ho di'ak, entaun la mosu problema boot ne'ebé fó impaktu ba kapitál Dili.

"Iha loron 31 Dezembru 2020 no 1 Janeiru 2021 nian, KMD rezista insidente besik 50, ne'ebé maiória husi postu Dom Aleixo ne'ebé rezista insidente hamutuk 33 depois mak postu administrativu sira seluk," Dehan Henrique iha nia knaar fatin Kaikoli, Segunda (4/1).

Tuir nia, kazu insidente ne'e akontese tanba konsumu alkohol depois sadik malu, entaun PNTL halo atuasaun imediatu depois lori mai komandu halo identifikasaun hafoin haruka sira fila.

Alende ne'e kazu asidente tráfiku KMD rejista hamutuk 14, maibé kazu fatal ka mate ne'e laiha kompara ho tinan sira seluk ne'ebé liu ona.

"Tama dia 1 ne'e kazu fatal ka ema mate ne'e laiha, kompara ho 2019 nian, ema ne'ebé mate tama ba tinan foun ne'e hamutuk 26 no 2020 ne'e iha 19, maibé tinan ne'e laiha asidente fatál ruma," katak Komabdante Henrique.

Entretantu, selebrasaun tinan foun nian, seguransa buat hotu la'o ho kontroladu, mezmu mosu insidente no asidente balun maibé polísia sei bele responde ho lalais, tanba komandu Munisípiu Dili hetan apoiu másimu husi parte komandu jerál, Unidade Polísia Fronteira (UPF), Unidade Polísia Marítima (UPM) Sentru Formasaun Polísia (SFP) nomós Unidade Espesiál Polísia (UEP).

Iha Parte seluk Paison mos ema tiru rame iha de'it kalan 31 Dezembru no iha loron 1 Janeiru 2021 estrda kapital no Tasi Ibun sira kuran ema nia prezensa. (*)