Kompañia ne'ebé munisípiu Dili kontrata hodi raut lixu iha Dili hamutuk tolu ho sira nia kamioneta hamutuk 50 mak halo operasaun ba lixu.

Prezidente Autoridade munisípiu Dili, Gaspar Soares hateten, pessoál sira ne'ebé rekrutadu hodi limpeza lixu iha Dili, rekruta kada postu administrativu ida kompostu husi ema na'in 30, no osan ne'ebé uza hodi haree ba asuntu lixu iha kada tinan, gasta milliaun $1.

"Kada tinan, millaun $1 resin, ita gasta de'it ba lixu iha Dili laran hodi selu karreta kontratadu 50 ne'e depois hodi selu mós ita nia pessoal limpezas hotu ne'ebé iha kada postu hamutuk 30 pessoas", Gaspar Soares hateten ba jornalista iha nia knaar fatin Matadouru Dili, sesta (11/12).

Nia esplika, konteúdu kontratu ne'ebé halo ho kompañia sira katak, kada kareta tenke foti karada tolu iha loron ida, no domingu foti de'it karada rua.

"Mais ha'u haree katak fulan hirak ikus mai ne'e ita konsege rezolve lixu sira ne'e ho di'ak, no komunidade ladun kestiona dehan lixu ne'ebé la foti", nia dehan.

Maske nune'e, nia dehan, ema hotu presiza fó atensaun di'ak liu tan oinsá atu haree kona-ba jesatun lixu iha munisípiu Dili.

Tuir planu, tinan oin, munisípiu Díli sei halo (hand over) jestaun lixu ba seitór privadu sira, tanba daudaun ne'e sira hahú ona prosesu rekrutamentu ba kompañia sira iha komisaun nasional aprovizionamentu.

"Ita atu rekruta kompañia tolu, ida atu haree de'it jestaun lixu iha Dili Leste, ida iha Dili Oeste no ida seluk mak atu haree kona-ba jestaun lixu iha Tibar", nia hateten.(*)