“Ita nia planu operasaun, ita prepara no fahe ona ba eskuadra sira atu bele implementa no bele asegura durante dia 1 no dia 2”, Komandante PNTL munisípiu Díli Superintendente Xefi Henrique da Costa hateten ba jornalísta sira iha Kaikoli, sesta (30/10).

Nia dehan, orientasaun husi KMD kona-ba operasaun ninian, entrega hotu ona iha eskuadra sira, no sira rasik mós identifika ona fatin ka Simitéiru hirak ne’ebé komunidade sei lori ai-funan ba vizita.

“Ita mós identifika ona fatin ne’ebé mak dala-ruma iha dia 1, komunidade sira ba vizita, sei koloka ita nia seguransa atu nune’e garante duni seguransa”, nia esplika.

Polísia Munisípiu Díli mós halo ona koordenasaun ho parte unidade sira seluk hanesan Unidade Espesiál Polísia (UEP), Komandu Jerál (Komjér), Unidade Polísia Marítima (UPM), Unidade Polísia Fronteira (UPF) nian ne’ebé koloka iha área Aeroportu, inklui husi Polísia Militár (PM) atu apoiu ba iha KMD hodi fó seguransa durante Finadu.