Tarde Raut Foer, Komunidade Balun Sunu Ahi Besik Rin Eletrisidade

Sunu foer fatin besik rin no fiu elektrisidade Sunu foer fatin besik rin no fiu elektrisidade Foto Tempo Timor

Tempotimor (Dili)-Komunidade balun iha area Vilaverde deside hodi sunu foer ne’ebé soe besik rin eletrisidade tanba deskontente ho ekipa raut foer husi Munisipiu Dili ne’ebé semana ida resin la raut foer iha fatin refere.

Asaun komunidade ne’e, maske nu’udar asaun ‘protesta’ ida maibé fó perigu tanba ahi ne’ebé lakan boot bele fó impaktu negativu, liu-liu fiu eletrisidade mós bele lakan.

Tuir observasaun jornalista www.tempotimor.com iha fatin sunu foer, iha Sabadu kalan, komunidade balun sunu foer ne’ebé butuk besik rin eletrisidade.

Ba ida ne’e, Komunidade Bairo Aspol, Aldeia Guidion, suku Vilaverde, Postu Administrativu Vera Kruz, Danilo Martins hatete, komunidade balun deside sunu foer tanba besik semana ida ona parte kompetente la mai raut foer.

Foer ne’e, nia dehan, sai dodok no iis, tan ne’e bainhira husik kleur tan bele fó mós impaktu negative ba komunidade sira-nia saúde.

"Sira parte saneamentu mai raut foer kuandu haree foer uitoan de'it sira la raut, entaun husik foer ne'e to'o semana ida resin, entaun komunidade sira balun sunu tanba foer ne'e dois fó impaktu ba komunidade nia saúde," dehan nia.

Nia hatete, komunidade sira ne’ebé hela besik fatin refere soe foer besik rin eletrisidade tanba fatin soe foer aat ona.

"Iha bairro ne'e lisu fatin aat tiha ona entaun komunidade hotu-hotu so’e fali foer iha fatin ne'ebé besik rin eletrisidade nian," nia dehan.

Maske nune’e, nia dehan, asaun sunu foer besik rin eletrisidade ne’e mós laos asaun ne’ebé di’ak, tanba bele hamosu risku.

"Sunu foer besik loos iha rin eletrisidade ne'e fó impaktu tanba sunu beibeik hanesan ne'e ba oin bele estraga fiu eletrisidade nian no bele mosu sirkuitu."

Tan ne’e, nia husu ba ministériu relevante atu tau atensaun ba problema ne’e nune’e bele evita buat balun ne’ebé la espera.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.