Login to your account

Username *
Password *
Remember Me

Items filtered by date: Tuesday, 13 August 2019

Tempotimor (Dili) – Prezidente – Repúblika (PR), Francisco Guterres Lú Olo husu ba embaixador nain tolu (3) ne’ebé foin simu posse atu haluan liutan kooperasaun Timor – Leste nian iha Brasl, Estadus Unidus Amerika no Nova Zelándia. 
 
“Prezidente no Governu nomeia Ita-Boot sira tanba fiar katak ita-boot sira sei koopera ho governu Brazil, Estadus Unidus no Nova Zelándia, atu haforsa liután relasaun entre ita-nia rain no sira-nian. Prezidente Repúblika fiar katak Embaixador sira ne’ebé foin simu pose iha kapasidade. Ha’u fiar katak sira bele hasa’e no loke liután nível no ámbitu kooperasaun entre ita-nia Estadus,” hatete PR Lu Olo hafon seremóna posse ba embaixador nain tolu ne’e iha Palásiu Prezidensial Bairro Pite, Dili, Tersa (13/08). 
 
Kona-ba Brasil, PR Lú Olo aproveita oportunidade ida ne’e atu fó-hanoin katak iha simeira CPLP, hala’o iha Brasil, mak Timor-Leste tama ofisialmente  nu’ udar membru CPLP nian. 
 
“Ita simu ona Chefes Estadu Brasil nian, Fernando Henrique Cardoso no Luís Inácio Lula da Silva, iha ita-nia país. Kooperasaun entre ita la’o di’ak, liuliu iha área edukasaun, iha formasaun ba kuadrus universitárius. Timor-Leste mak lolo prezidénsia rotativa CPLP nian ba Brasil, iha tinan 2016,” nia fó hanoin. 
 
Nia konsidera, embaixador Olímpio Branco, ne’ebé foin simu pose, iha karreira naruk ona. Hahú servisu kedas ba Ministériu Negósiu Estranjeiru no Kooperasaun bainhira instituisaun ida ne’e harii, molok restaura formalmente Independénsia Timor – Leste. Kaer horiuluk knaar nu’ udar Sekretáriu-Jeral iha Ministériu ne’e. Embaixador Olímpio Branco hala’o ona knaar nu’udar Embaixador Timor-Leste nian ba Repúblika Popular China no ba Repúblika Cuba. 
 
“Ha’u konfia iha nia kompeténsia no dedikasaun no ha’u deseja susesus ba Embaixador ne’e,” nia hatete. 
 
Kona-ba Embaixador Isílio Coelho, importante hatete katak, nia  hanesan  rin ida Ministériu Negósius Estranjeirus no Kooperasaun nian. Hahú kedas servisu ba Ministériu ne’e bainhira instituisaun ida ne’e harii formalmente, molok ita restaura formalmente ita-nia Independénsia. Embaixador Isílio hala’o knaar oioin, inklui Sekretáriu Jeral MNEC nian no Embaixador ba Japão. Susesus ba ninia knaar foun nu’ udar Embaixador. 
 
Husi kedas loron ita restaura ita-nia independénsia, tanba ita estabelese relasaun diplomátika iha nível embaixador rezidente, kooperasaun ho Estadus Unidus hala’o iha sektor oioin, liliu iha área defeza.
 
Ikus liu, señor Embaixador Lisualdo, quadru ida husi MNEC, diplomata karreira nian, sei hala’o knaar iha país viziñu ida, país ida ne’ebé hamutuk ho ita iha momentu difísil sira ne’ebé ita hasoru horiuluk.  
 
“Ha’u fó-hanoin katak Nova Zelándia integra mós INTERFET (forsa internasionál  ne’ebé tun iha Timor-Leste, iha 20 Setembru 1999). Ita haree militar sira-nia profisionalismu no nain ida mate iha períodu tranzisaun,” nia hatete.  
 
PR Lú Olo mós hare katak, iha mós momentu difísil seluk ida, iha períodu  istória foin liubá,  nu’udar Estadu, ne’ebé komunidade internasional mós rekoñese, iha 2006, Nova Zelándia mai mós tulun Timor-Leste. 
 
“Kooperasaun ne’e sei boot babeibeik no ha’u fiar diplomata ida ne’e, katak Embaixador Lisualdo, sei hatene loke no haklean liután kooperasaun ho Nova Zelândia,” nia fiar. 
 
Ikus liu, ha’u aproveita okaziaun ida ne’e atu hatete ohin katak, bainhira presiza, ha’u sei fó apoiu tomak ba embaixador sira. Ita-Boot sira iha ha’ u-nia konfiansa.
 
 
 
 
 
Published in Politika
Tempotimor (Dili) – Partidu Dermokrátika iha Parlamentu Nasionál husu Governu no Estadu atu dignifika povu Timor-Leste nia sakrifísiu iha loron Konsulta Populár ne’ebé sei selebra ba dala ruanolu.
 
“Povu Timor-Leste atu selebra loron 30 Agostu, tinan ruanolu referendu iha Timor-Leste. Ita hotu sei hanoin ho neon fresku referendum ne’e nia objetivu no oinsa mak ita realiza referendum,” hatete Prezidente Bankada Demokrátika, António da Conceição, Tersa (13/08/2019) iha Parlamentu Nasionál. 
 
Tuir Antonio, iha momentu ne'ebá, iha duni opsaun ne’ebé Timoroan sira hili liuhosi dalan Unidade Nasionál no mobiliza povu hodi fó desizaun polítika, hodi hasai duni povu husi okupasaun militár Indonézia nian. Deputadu ne’e mós afirma, TL hetan nia ukun rasik an, tanba povu nia kontribuisaun no vontade boot.
 
“Ita konsege independensia, tanba vontade povu nian. Bankada PD iha uma fukun ida ne’e, husu atu polítika sira dignifika povu nia sakrifísiu hodi hala’o selebrasaun ida ne’e, la'ós de’it serimoniá komemorativa. Maibé, sai eventu ida atu dignifika povu nia determinasaun, eroi no mártires sira nia luta no sakrifísiu hodi fó sentidu kle'an ba ukun rasik an nian, ne'ebé ema hotu inspira dezenvolvimentu,” tenik António.
Published in Politika
Tuesday, 13 August 2019 14:07

MNEK La Partisipa Embaixadór Simu Posse

Tempotimor (Dili) – Bankada Demokrátiku (PD) preokupa tanba Ministru Negósiu Estranjeiru no Kooperasaun (MNEK), Deonisio Babo la marka prezensa iha serimonia tomada de posse ba embaixadór na'in tolu ne'ebé reprezenta Timor-Leste iha Brazil, EUA no Nova Zelándia.
 
"Ohin Prezidente Repúblika (PR) fó posse ba embaixadór na'in tolu. Ha'u rona katak Ministru Negósiu Estranjeiru no Kooperasaun la marka prezensa iha tomada posse ne'e," dehan deputadu Bankada PD, Adriano do Nascimento iha plenaria, Tersa (13/08/2019).
 
Deputadu ne'e preokupa, tanba Timor-Leste haruka nia ema ba estranjeiru, maibé ministru ne'ebé tutela la marka prezensa.
 
"Ha'u preokupa katak ita haruka ita nia embaixadór ba ema nia rai, maibé ministru ne'ebé   toma konta ba ida ne'e, la marka prezensa. Sera que, ida ne'e parte ida husi boikota malu ka oinsá. Se hanesan ne'e, imajen ladún di'ak se PR fo pose, depois ministru ne'ebé toma konta la marka prezensa," Adriano hatete.
 
Hatan ba preokupasaun deputadu Adriano do Nascimento nian, portavoz governu dehan, MNEK la simu konvite husi PR.
 
Embaixadór na'in tolu ne'ebé ohin, Tersa (13/08/19) hetan tomada posse husi Prezidente Repúblika, mak Olimpio Branco nu’udar Embaixadór TL ba Brazil, Isilio Coelho nu’udar Embaixadór TL ba Estadus Unidos Amérika no Lisualdo Gaspar nu’udar Embaixadór TL ba Nova Zelándia.
 
Embaixadór na'in tolu ne'e mós hetan knaar liuhosi Dekretu Prezidente Repúblika númeru 36/2019, 37/2019 no 38/2019, nomeia husi VII Governu hamutuk ho embaixadores nain tolu seluk mak Governu VIII hasai tiha husi lista proposta AMP ninian.
Published in Politika
Tempotimor (Dili) – Bankada opozisaun Frente Revolucionaria Timor-Leste Independente (FRETILIN) iha Parlamentu Nasionál, konsidera Parlamentu Nasionál (PN) mukit liu iha asuntu plenaria. Tanba, liu tinan ida ona maibé laiha lei ne'ebé PN deskute.
 
"Atividade Parlamentu Nasionál mukit liu. Durante ne'e, laiha ordem do dia. Maibé, ita hala'o plenaria. Uluk iha tiha entendimentu ida katak bainhira laiha ordem do dia, laiha plenaria," dehan deputadu Fretilin Francisco Miranda Branco hafoin plenaria, Tersa (13/08/2019).
 
Tuir Branco, PN iha duni situasaun emerjensia ida kona-ba proposta lei haat husi Governu. Proposta Governu ne'ebe PN rasik ma hasai desizaun, husu urjensia, agora urjensia hotu ona, ita filafali ba normal, situasaun parlamentu nian mak hanesan nune'e. Mukit liutan," dehan Branco.
 
Lei KAK
 
Bankada FRETILIN mós afirma, iha projeitu de lei ida, iha komisaun A. Maibé, konzeladu tiha. Ita iha Ministru Reforma Lejislativa Asuntu Parlamentar ida, maibé ita laiha proposta de lei. Ami mós kestiona reforma lejislativa saida, to'o agora proposta lei ida laiha. Tinan ida liu ona, maibé atividade PN mukit ba beibeik," dehan Branco.
 
Hatán ba preokupasaun ne'e, Prezidente Komisaun A Parlamentu Nasionál, Carmelita Moniz katak, lei Komisaun Anti Korrupsaun (KAK) la konzeladu. Maibé, foin estuda hotu kapítulu  ida.
 
"Projeitu de lei Komisaun Anti Korrupsaun la konzeladu. Ami halo hela diskusaun durante tempu liubá. Kapítulu primeiru kona-ba dispozisaun jerál hotu ona. Ne'ebé artigu hamutuk ruanolu resin hotu ona. Agora, ami atu tama ba kapítulu segundu. Bazeia ba hanoin balun ne'ebé mai husi kolega deputadu inklui sosiedade sira katak, tenke iha prevensaun no represaun," dehan deputada Carmelita.
 
Deputada ne'e komenta, atu tama ba kapítulu foun Komisaun A tenke buka referensia inklui halo kapitulu foun kona-ba deklarasaun de bens.
Published in Politika
Tempotimor (Díli) – Prezidente Repúblika, Francisco Guterres Lú Olo, Tersa (13/08/19) fó tomada posse embaixadór Timor-Leste ba nasaun Brazil, Estados Unidos Amérika no Nova Zelándia.
   
Liuhosi Dekretu Prezidente Repúblika númeru 36/2019, 37/2019 no 38/2019 dekreta hodi nomea Olimpio Branco nu’udar Embaixadór ba Brazil (hodi troka Embaixadór Gregório de Sousa), Isilio Coelho nu’udar Embaixadór ba Estadus Unidos Amérika (hodi troka Embaixadór Domingos Sarmento Alves) no Lisualdo Gaspar nu’udar Embaixadór ba Nova Zelándia (hodi troka Embaixadór Cristiano da Costa).
 
Komunikadu Imprensa ne'ebé Tempotimor.com hetan, husi Palásiu Prezidente Repúblika hatete, Olimpio Branco, Isilio Coelho no Lisualdo Gaspar, nu’udar funsionáriu Ministériu Negósiu Estranjeiru no Kooperasaun (MNEC) ho karreira diplomata. 
 
Maske nune'e, tuir dokumentu ofisiál ne'ebé tempotimor.com asesu husi Palásiu Governu katak kandidatu embaixadór na'in tolu (3) ne'e, hetan nomeiasaun husi VII Governu Konstitusional ne'ebé lidera husi PM Alkatiri. 
 
Diplomata Timoroan na'in tolu ne'e mós, hetan ona aseitasaun husi nasaun ne'ebé sira sei hala'o knaar ba, nune'e Governu AMP laiha kbiit atu ‘re-call’ sira.
 
Entretantu, tuir lista ne’ebé Governu aprezenta naran husi kandidatu embaixadór sira hamutuk 16, mak hanesan tuir mai ne’e:
 
1. Ines Maria de Almeida, Embaixadora ba Cambera, Austrália 
2. Gil da Costa, Embaixadór ba Reinu Unidu Gra-Britania no Irlandia Norte
3. José Luis Guterres, Embaixadór  ba Konfederasaun Suisa
4. Paulo Assis Belo, Embaixadór  ba Repúblika Mosambike
5. Lisualdo Menezes Coimbra Gaspar, Embaixadór ba Wellingtong, Nova Zelandia
6. Isilio Antonio de Fatima Coelho da Silva, Embaixadór ba Washington DC, EUA.
7. Isabel Amaral Guterres, Embaixadora ba Lisboa, Portugál.  
8. Isabel Amaral Guterres, reprezetante permanente TL ba Sekretariadu Ezekutivu CPLP
9. Isabel Amaral Guterres, Embaixadora la rezidente TL ba Republika Kabuverde.
10. Olimpio Maria Alves Gomes Miranda Branco, Embaixadór ba Repúblika Brazil
11. Maria Natalia Guterres Viegas Carrascalao, Embaixadora ba Singapura
12. Ilidio Ximenes da Costa, Embaixadór ba Japaun
13. Hermenegildo Lopes, Embaixadór ba Kambodia
14. Abrão dos Santos, Embaixadór ba Republika Popular Xina
15. Joana Veneranda Amaral, Embaixadora ba Santa Sé
16. Armandina Maria Gusmão dos Santos, Embaixadora TL ba Reinu Tailándia
Published in Politika
Darwin_Optic

Popular

Error: No articles to display

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« August 2019 »
Mon Tue Wed Thu Fri Sat Sun
      1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31  

Tempo Timor Networks

Online Counter