Sekretáriu Estadu Juventude no Desportu (SEJD), Abrão Saldanha "Nokosiku" hatete, Governu hahú tau importánsia ba futebolista atu dezenvolve disiplina no deveres ba sidadaun sira.

"Governu haree dezenvolvimentu futebool juvenil ne'e importante tebes dezenvolve ba futuru futebolista atu dezenvolve sidadaun sira ho disiplina ho valór desportu nian”, dehan Nokosiku iha Salaun Magna SEJD, Largo, tersa (14/12).

Durante atividade suporta atividade dezenvolvimentu Futebolista ne'e SEJD hala'o ketak maibé liuhusi akordu ida ne'e atu la'o hamutuk suporta Futebolista iha Timor-Leste.

"Durante ne'e ita ida-idak, sentru futebol mós halo liuhusi Governu, federasaun mós halo programa rasik, liuhusi asosiadaun, maibé agora ba oin ne'e ho kooperasaun ne'e ita halo hamutuk iha fatin ida”, nia esplika.

Alende ne'e Prezidente Federasaun Futebol Timor-Leste (FFTL), Francisco Jerónimo Martins hatete, dadaun ne'e iha programa ida ne'ebé mak foku ba futebolista sira ne'ebé lansa ona iha Munisípiu sira.

"Federasaun mós iha programa ida ne'ebé halai liuba juvenil ne'ebé iha Munisípiu hothotu iha, duké ida idak halo ninian tanba ida ne'e mak ami hakarak hamutuk atu halo buat ida ne'ebé mak sistematiku atu prepara futuru joven nian”, hatete Francisco.

Depois asina akordu ne'e kada akipa sira sei dezenvolve akademia sira ne'ebé mak durante la'o, suporta sira atu automiza nia jestaun iha ida-idak nia fatin.

Hafoin ida ne'e mak SEJD no FFTL sei transfere ida-idak nia responsabilidade ba akademia liuhusi orsamentu ne'ebé SEJD no FFTL iha. (*)