Sekretáriu Estadu Juventude no Desportu (SEJD), Abrão Saldanha hatete, atividade amizade atu kontinua prinsípiu as'ua’in sira-nian ne’ebé halibur malu sai unidade, maske diferensa organizasaun arte-marsiais, maibé hamutuk atu haree ba dezenvolvimentu.

"Komemorasaun 28 novembru tinan ne'e, monu iha Baukau, ita realiza liuhusi atividade desportu komunitáriu atu hametin koezaun relasaun entre ema ho ema iha komunidade", dehan abrão iha kampu futeból bainhira realiza abertura jogu iha Suku Triloka, sesta (12/11).

Desportu komunitáriu hanesan mós meus ida atu deskobre taléntu povu nia oan sira ne'ebé iha nivél suku no aldeia atu kompete iha nivél nasionál.

Tanba ne’e, SEJD mós iha ona plánu atu hahú aktividade desportivu husi baze kada tinan atu hametin liu tán koezaun no deskobre foinsa'e sira nia talentu.

Prezidente Autoridade Munisípiu Baukau, Olivio Freitas mós hatete, atividade desportu ne’e, parte ida atu valóriza herói sira ne'ebé mate ona ba liberdade Timor-Leste nian.

"Labele hanoin ba premiu ne'e, premiu ne'e atu motíva ita, la'os tan ida ne'e atu hamosu problema, iha kampu futebol nia laran, ne'e la di'ak ida, atu se de'it mak hakarak sai jogadór di'ak iha futuru, tenke komprende regras jogu", dehan PAM Baukau

Hanesan joven foinsa'e tenke hatudu buat ne'ebé di'ak liu husi jogu refere, tanba iha nasaun seluk jogadór sira nia saláriu boot liu fali Prezidente Repúblika no Primeiru Ministru Timor-Leste nian.

Responsável husi ekípa Unidade 6, Cipriano Cabral hatete, prontu atu kompete iha jogu komunitáriu refere, maske situasaun Covid-19 ne’ebé difikulta jogadór balun la tuir treiñu, maibé espera ekípa unidade 6 sai vensedór ba epóka tinan 2021.

"Juventude unidade 6 autoridade unidade 6 prontu atu kolabora no kontribui prosesu dezenvolvimentu liliu iha prosesu desportivas", katak Cipriano.

Atividade desportu komunitária ne’e, ohin loron 12 fulan-novembru tinan 2021 halo ona abertura ba jogu futebol iha Suku Triloka, Postu Administrativu Baukau Vila, Munisípiu Baukau. (*)