Print this page

Ducatang Kampiaun Nasionál Siklismu TL Featured

Tempotimor (Likisa) – Siklista Ducatang Da Costa Dos Santos sai nu’udar primeiru lugar ba kategoria Elite Mane iha eventu halai bisikleta Mountain Bike (MTB) ne’ebé hala’o iha munisipiu Likisa, Sabádu (27/07/2019).

Total atleta ka siklista sira ne’ebé partisipa iha eventu ne’e hamutuk nain 54 ne’ebé kompostu hosi kategoria junior feto hamutuk nain 5, kategoria junior mane nain 5, kategoria elite feto hamutuk nain 4, kategoria elite mane nain 28 no kategoria master hamutuk nain 12. 

Prezidente Federasaun Siklismu Timor – Leste (FSTL), Angêlo Henrique hatete, ida ne’e atividade regular ba kampeanatu nasionál, tanba sei iha eventu internasional ida ne’ebé sei hala’o iha Filipina iha tinan ida ne’e nia rohan. 

“Agora siklista sira ne’ebé mak atu ba partisipa iha eventu ida ne’e tenke liuhosi prosesu selesaun. No selesaun ida ne’e tenke liuhosi kampeanatu nasionál atu bele hili siklista ne’ebé mak di’ak hodi bele reprezenta Timor – Leste iha Filipina ne’e,” hatete prezidente Angêlo ba Tempo Timor iha suku Loidahar, Likisa, Sabadu (27/07). 

Nia hatutan, FSTL hetan jata ba ema nain 3 (tolu) de’it inklui ofisial ida. 

“Agora iha kampeanatu nasionál ne’e mak ita buka se mak atu ba Filipina,” nia esplika. 

Iha fatin hanesan, siklista nasionál, Ance Cabral hatete, eventu ne’e importante tebes hodi identifika kampeanatu nasionál sira hodi bele partisipa iha eventu internasional sira. 

“Eventu ohin ne’e ita atu halo selesaun ba ita nia siklista nasionál sira ne’ebé mak sai kampeanatu nasionál hodi prepara sira reprezenta Timor iha eventu internasional sira tuir mai,” esplika Ance. 

Iha eventu ne’e, ida ne’ebé sai manan nain daruak ba kategoria Elite Mane nian mak Orlando da Costa, no manan nain datolu mak Jacinto de Jesus da Costa. Manan nain dahuluk iha kategoria elite mane hetan osan hamutuk $350, manan nain daruak hetan $300, no manan nain datolu hetan $250. Premiu ne’e mós vale ba kategoria Elite Feto.   

Entretantu, manan nain dahuluk ba kategoria Master hetan premiu ho valor osan $300, manan nain daruak hetan $250 no manan nain ikus hetan $200. No valor premiu ba manan nain dahuluk iha kategoria Junior Feto mak Letizaria Tang da Costa mak $ 300, manan daruak mak Ceo da Costa Guterres hetan $250 no Maria José da Silva okupa vensedora datolu ho valor premiu $ 200. Valor premiu ida ne’e mós vale ba vensedor dahuluk iha kategoria Junior Mane mak Carlos M. de Oliveira, manan nain daruak mak Adão Mendonça do Rego no ikus liu mak Goris Waskam Dato.

Rate this item
(1 Vote)
Last modified on Sunday, 28 July 2019 23:11
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items