“Ohin (10/06) iha diskusaun ne'e, iha aprezentasaun ba metodolójia oinsá mak atu halo konsultasaun la'ós de'it rona governu nia perspetiva, maibé rona mós komponente hothotu iha sosiedade, konfisaun relijióza sira-nia, veteranu, e arte marsiál rasik oinsá, sira hakarak atu lei ida hanesan ne'ebé ba sira. Husi prosesu ida ne'e mak sei propoin revizaun nesesária ne'ebé mak tuir perspetiva hothotu nian”, esplika SEJD, Abrăo ‘Nokosiku’ Saldanha, iha salaun Ministériu Finansa (MF) Ai-tarak Laran, kinta (10/06).
Tarjetu husi konsulta sira ne'e atu aprezenta kona-ba nesesidade sira hodi halo revizaun ba lei, tanba dadaun ne'e ekipa SEJD nian sira mós halo hela konsultasaun iha munisipiu sira.
“Agora dadaun ba pratikante sira halo hela levantamentu online ida, e agora diskusaun ho entidade relijioza la'o hela, ho komponente sosiedade mós la'o hela, e diskusaun entrevista ida la'o hela, agora hein tan perspetiva husi instituisaun sira hotu no organizasaun arte marsiál sira-nian, husi ne'e ita bele konklui ona nesesáriu revizaun mak saida-saida”, haktenik nia.
Maske nune'e, prosesu atu halo reativasaun ba atividade GAM, dadaun ne’e Komisaun Reguladóra Artes Marsiál (KRAM) la’o hela, maibé atu enkuadra sira loloos tuir nia dalan, presiza duni halo revizaun ba lei sira anterior nian.
“Ne'e mak liuhusi konsultas ho revizaun sira ne'ebé mak iha, atu nune'e bele, la'ós de'it reativa de'it, mak ida ne'e de'it la’e, maibé saida mak kontinua halo tan ba organiza di'ak liután arte marsiál, sei rona ho sira-nia perspetiva, no ida ne'e mak sei tama iha revizaun ida ne'e”, nia esplika.
Bainhira konkluzaun ba revizaun lei sira remata ona, governu liuhusi SEJD sei halo omólogu hodi aprezenta ba Primieru Ministru, Taur Matan Ruak, hafoin aprezenta iha Konsellu Ministru no ikus liu sei halo konkluzaun finál.
Entretantu, sorumutuk ida ne'e bazeia ba orientasaun Primeiru Ministru (PM), Taur Matan Ruak nia despaixu númeru 20/2021, hodi hari'i ekipa interministerial ida atu halo análiza no propoin nesesária revizaun ne'ebe presiza ba lei ezersisiu arte marsiál. (*)
