Nelio Optimizmu, Otel Sufisiente ba Atleta 900 iha Jogu CPLP 2020 Featured

Sekretario Estadu Juventude desportu, Nelio Isac Sekretario Estadu Juventude desportu, Nelio Isac Foto suplai

Tempotimor (Dili) Iha fulan Jullu tinan oin, Timor Leste sei realiza eventu desportu boot ida ne’ebé sei partisipa husi ofisial, atleta no treinadór nasaun membru CPLP besik na’in 900.

Maske iha duvida ba alozamentu hodi fasilita atleta sira, maibé Sekretariu Estadu Juventude no Desportu Nelio Isaac Sarmento optimizmu katak iha fatin sufisiente ba sira atu hela.

“Atu halo alozamentu ba atleta no ofesiais sira ne'e fatin sufisiente tanba Timor Leste iha otel lubuk ida ne'ebé kondisaun di’ak par sira hela,” dehan SE Nelio iha palasiu governu, Kuarta (10/07).

Tuir dadus ne’ebé iha, Nelio dehan, kada nasaun membru sei lori atleta, ofisial no treinadór 92.

"Dadus ne'ebé ami aprezenta, komesa husi atleta to'o treinadór mak sira partisipa hotu entaun kada pais ida hetan númeru 92. Iha ema na'in 92 ne'e kompostu husi atleta, ofisiais no treinadór. Nune'e iha nasaun ualu ne'e mak partisipa hotu, ita sei simu atleta 800. No husi ida ne'e aumenta tan akompañantes ministru 50. Tanba ne'e bele dehan katak ita sei simu ema besik 900," dehan Nelio.

Kona-ba kondisaun infra-estrutura, nia dehan, iha fulan oin hahú halo reabilitasaun ba GMT no kampu praia iha Largo Lecidere.

"Infra-estrutura ba modalidade desportiva sira ita iha kondisoens, tanba ne'e iha fulan oin mai GMT hahú halo reabilitasaun, halo kontrusaun ba kampu praia iha Lecidere ne'e. Tanba ne'e ita espera katak to'o iha Dezembru reabilitasaun GMT no kampu Praia finaliza ona," dehan nia.

Nia dehan, jogu CPLP ne’e sei hahú iha 12 Jullu no sei remata iha 24 Jullu 2020. Iha eventu ne’e sei iha modalidade 8 mak hanesan Futebool, Basketbool, Xadres, Kungfu, Karate, Taekwondo, Atletizmu, no Tenis Kampu (Lantai).

Rate this item
(1 Vote)
Last modified on Thursday, 11 July 2019 09:39
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.