Prezidente APFTL Zaulino Gomes da Silva informa, prosesu selesaun ba membru Parlamentu Foinsa'e sei hala'o iha teritoriu Timor Leste, hahú husi nivel Postu Administrativu to'o Munisipiu.
"Ita lansa prosesu selesaun ba eleisaun ba membru Parlamentu Foinsa'e iha periodu dahaat nian husi 2019 to'o 2022. Tanba ne'e mak ita lansa ofesialmente ba públiku par públiku hotu hatene", dehan Zaulino iha salaun Katedral Dili, Segunda (17/06/2019).
Nia hatete, iha semana oin ekipa husi nasional sei tuun ba halo sosializasaun iha nivel Postu Administrativu hotu-hotu hodi dezamina informasaun ba juventude sira atu partisipa iha selesaun refere.
Tuir rezolusaun APFTL nian prioridadw selesaun ba foinsa'e sira husi idade tinan 12 to'o tinan 17.
"(Entre idade refere) belle kompete sai membru Parlamentu Foinsa'e dahaat nian," dehan Zaulino.
Iha fatin hanesan Sekretáriu Estadu Juventude no Desportu Nelio Issac Sarmento dehan, SEJD tinan ne'e tama ona époka dahaat ba krisaun Parlamentu Foinsa'e.
"Husi primeiru to'o terseiru labarik sira kuaze 300 resin," dehan nia.
Ba tinan ne'e, Nelio dehan, SEJD serbisu hamutuk ho APFTL atu sira bele transfere sira-nia esperensia ba foinsa'e sira seluk ne'ebé sei hola parte iha selesaun sai membru Parlamentu Foinsa'e.
"Hahú tinan ne'e ita hahú introduz ona APFTL ne'ebé aprezentasaun sei mai husi labarik joven defisiénsia sira, entaun karáter loloos husi APFTL ne'e mak ita prepara labarik sira ne'ebé iha abilidade sidadania nian ba lideransa iha futuru", dehan Sekretariu Estadu ne'e.