Tuir Abrão, joven la'ós sai autór ba krime, maibé joven sai autór importante ba ekonomia Timor-Leste, liuhusi kontribuisaun ba kofre estadu depois de fundu minarai.
"Ha'u la konkorda katak joven barak mak sai autór ba konflitu, tanba ohin ha'u mós informa ba Prezidente Repúblika (PR) katak, depois de fundu minarai, osan ne'ebé tama mai Timor-Leste ne'e husi servisu joven nian, ne'ebé sira rasik mak ba buka iha rai liur no rai laran," Abrão ko’alia asuntu ne’e hafoin audiénsia ho Prezidente Repúblika Francisco Guterres Lú Olo, iha Palásiu Prezidensiál bairru-pite, Dili, Tersa (10/11).
Governante ne'e mós afirma, husi kontribuisaun osan ba ekonomia Timor-Leste ne'e tanba poténsia joven nian, tanba iha TL, joven de'it pursentu 75%.
"Juventude husi tinan 35 mai kraik ne'e konstitui ita-nia demográfia ne'e 75%. Ohin loron rai ne'e la'o hakmatek nafatin hanesan ne'e, tanba kontribuisaun mós joven sira nian, tanba sira iha númeru boot teb-tebes," nia subliña.
Nia mós rekoñese katak, joven sira involve iha krime, maibé joven mós autór ba solusaun.
"Joven la'ós autór krime de'it, maibé ohin PR mós refere di'ak ba ami katak, joven tenke lori solusaun, entaun joven sira mós buka solusaun duni ba sira-nia moris rasik. Estadu nia papél mak promove no loke espasu ba jovens sira atu sira mós envolve iha projetu dezenvolvimentu nasionál. Loos duni konflitu ne'e iha, maibé la'ós hotu-hotu," Abrão hateten.
Governante ne'e mós promete sei kria espasu ba jovem sira oinsa fó oportunidade ba joven sira atu, bele aplika talentu ne'ebé sira iha.
"Promove sira nia kreatividade nafatin, fó espasu ba sira hanesan loron boot sira ne'e, tanba ne'e iha tinan oin SEJD sei halo servisu re-orientasaun ba joven sira atu fila ba halo servisu ne'ebé produtivu ne'ebé bolu programa estimulasaun ba kreatividade joven sira-nian iha nivel nasionál to'o suku sira," Nokosiku hakotu.