Ekipa hirak ne'e, kompostu hosi ekipa mane 29 no ekipa feminina 19 Ne'ebe sei hala'o Jogu ne’e iha kampu multi funsaun Bebora, Dili.
Ekipa sira mak hanesan instituisaun mídia estatál rua hanesan Tatoli.IP no RTTL,EP, media privadu sira iha timor no instituisaun Governu ho órgaun independente sira hodi partisipa torneiu Futeból Salaun (futsal) “MAPKOMS” 2020.
Hafoin lansamentu, Ministru Francisco deklara, atividade ne’e hala’o hodi komemora loron Proklamasaun Independénsia RDTL ba dala-45, 28 novembru 1975- 28 novembru 2020, ho tema “futeból hanesan divertimentu desportu, Ba iha area futeból oinsa promove parseira ida mútua promove komunikasaun no hametin relasaun amizade”.
Nia hatutan, aleinde Objetivu seluk hosi torneiu ne’e atu hametin mós espíritu patriotizmu nasionalizmu no hakbesik MAPKOMS ho instituisaun mídia, jornalista no entidade relevante sira hodi kesi lasu amizade no parseiru liuhosi atividade desportiva.
“Atividade ida ne’e atu hato’o mós mensajen ida mai ita atu book an loroloron hodi kuida ita nia saúde, nune’e labele hetan moras,” dehan Ministru Francisco Jerónimo iha kampu multi funsaun Bebora, Dili, tersa (27/10).
Nia hato'o boa sorti ba ekipa futebol 48 ne'ebe sei kompete iha Futsal MAPKOMS, no husu atu joga ho di’ak.
“Tanba Iha ne’e mai joga la’ós atu mai tebe-malu, la’ós atu mai baku-malu. Ha’u fiar ita-boot sira hosi ministériu hotu, mídia sira hotu, imi sei joga ho di’ak to’o remata,” nia hateten.
Torneiu MAPKOMS ne’e hahú iha 27 outubru no sei termina iha loron 27 novembru, tinan ne’e.
Iha abertura ba torneiu ne’e prienxe kedas ho ekipa futeból feminina hosi MAPKOMS vs BNCTL.