Diretora Jerál Prestasaun saúde Ministériu Saúde, Odete da Silva Viegas hateten, moras ne'ebé númeru aas iha Timor-Leste hanesan, sofre fuan (sofre coração), tensaun, diabetes no kankru.

"Moras hirak ne'e, entaun ho ekipamentus ezersísiu ne'e, bele fasilita ema hotu-hotu sein iha osan, la presiza paga ba ekipamentus ne'ebé Organizasaun Mundiál Saúde oferese ba Munisípiu Díli, atu públiku hotu bele asesu", dehan Diretora Odete, hafoin halo lansamentu ba ekipamentus jinástika, iha Largo Lecidere, Sesta (11/09).

Diretora ne'e informa, ekipamentus ezersísiu la'os instala iha Largo Lecidere de'it, maibé instala mos iha Jardin Bebora, jardin dos Heróis 5 de Maio, iha Ministériu Saúde, ida iha edifísiu OMS nian no ida instala ona, iha Munisípiu Ermera.

"Planu estratéjiku ekipamentus ne'e, hahú uluk iha Munisípiu Díli, ita fasilita ekipamentus ne'e, atu enkoraja komunidade bele asesu ba fatin ezersísiu ne'e, la presiza selu tanba normalmente ema ba gym, ema tenke selu, maibé ida ne'e di'ak tebes", Nia afirma

Diretora ne'e espera, iha futuru Organizasaun Mundiál Saúde (OMS) nafatin apoiu Ministériu Saúde, atu bele instala mos ekipamentus ezersísiu refere, iha Munisípiu sira seluk.

"Ita labele garantia ba moras ne'e atu reduz, maibé fó hanoin ba ema hotu-hotu katak, ezersísiu ne'e hola parte husi oinsá reduz moras ida ne'e", tenik Nia

Nune'e, nia parte mos, sujere ba komunidade hotu-hotu, bele mai asesu ba ekipamentus jinástika no uza ho kuidadu.

Entretantu, Ekipamentus jinástika ne'ebé Organizasaun Mundiál Saúde (OMS), oferese ne'e, instala ona iha Largo Lecidere, mak ho naran hanesan, Bicycle, Tai Chi Spinners, Hip Twister, Double Air Walker, Seated Chest Press, Seated Leg Press, Double Sit-up Boards, no Elliptical Crros Trainer.(*)