Sekretáriu estadu Abrão husu ba dirijente PSHT atu aviza ba ninia membru sira hodi labele ultrapasa fronteira.

"Ohin ha’u mak bolu dirijentes PSHT señor Baltazar ho señor Pedro tanba loron hirak ne'e ita haree midia publika kona-ba kruza fronteira husi membru organizasaun PSHT, tanba ne'e mak ohin husu ba lideransa PSHT oinsa mak hakalma, informa ba nia membru sira atu hakmatek," dehan Abrão iha nia knar fatin, Lesidere, Dili, Sesta (11/9).

Nia hatete, governu la taka matan no serbisu maka’as oinsa mak halo fali pakote lejislasaun hodi akomoda organizasaun artemarsiais hotu-hotu nia aspirasaun nune'e iha lei hodi regulariza atividade organizasaun sira ne'e iha tinan sira mai oin.

"Esforsu mak governu tenke halo diálogu fali ho artemarsiais sira atu halo fali pakote lejislasaun kona-ba artemarsiais sira par bainhira ita reativa fali artemarsiais iha ona lei sufisiente atu reguraliza no atu tulun sira organiza sira-nia an di’ak liu tan," dehan Abrão.

Entretantu, asaun ultrapasa illegal husi membru PSHT hamosu mós preokupasaun husi Prezidente Repúblika Francisco Guterres Lú Olo.

PR Lú Olo mós konvida parte governu hodi halo enkontru relasiona ho membru PSHT sira ne'ebé kontinua tama-sai illegal iha fronteira rai maran.