Print this page

PR Lu Olo husu Atleta TL Hatudu Disiplina iha Sea Games

By November 15, 2019 1508
Atleta ho Ofisiais ba Sea Games vizita Palasiu Prezidente Atleta ho Ofisiais ba Sea Games vizita Palasiu Prezidente Foto tempotimor.com
Tempotimor (Dili)-Prezidente Repúblika Francisco Guterres Lu Olo husu ba atleta Timor-oan na’in 70 ne’ebé reprezenta Timor Leste hodi partisipa iha eventu Sea Games iha Manila atu tenke iha disiplina no hatudu talent hodi foti nasaun nia naran iha mundu.
 
PR Lu Olo deklara kestaun ne’e liu husi serimonia despedida ho atletas no ofisial Timor Leste husi modalidade 12 ne’ebé sei partisipa iha eventu Sea Games hahú husi 30 Novembru to’o 11 Dezembru tinan ne’e.
 
Xefe Estadu ne’e hatete, partisipasaun atleta Timor Leste iha eventu internasionál sira hanesan ne'e importante tebes atu bele tau no hatudu kapasidade Timor-oan nian rasik hodi kompete ho adversariu sira.
 
"Maski imi-nia tempu preparasaun limitadu, maibé bainhira ita aseita ona atu bá, ne'e hatudu katak, ita iha ona mak ita hakarak ba," dehan Lu Olo iha Palasiu Prezidensial Bairo-pite, Sesta (15/11/2019).
 
Lu Olo dehan, iha kompetisaun ida sempre iha ida mak manan no ida mak lakon. Importante mak tenke tau aas nafatin disiplina.
 
"Ha'u husu de'it ba alin sira mak ne'e, hatudu imi-nia talentu bá, karik imi manan no lori medalla ruma, ne'e di'ak liu tan, tanba bele foti Timor Leste nia naran sai boot. Tanba ne'e imi ba lori nasaun nia naran, tenke hatudu disiplina, kada modalidade buka hatudu imi-nia kapasidade, ha'u fiar katak imi bele," dehan Xefe Estadu ne’e.
Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items