Print this page

MTKI Inaugurasaun Kampu Futebó iha Lacu-Uma

Ministru Turizmu, Komérsiu no Indústria (MTKI), José Lucas do Carmo da Silva, tesi hela fita ba kampu Futebol iha Aldei Lacu-uma, Suku Baha-Mori, Postu Administrativu Venilale. Ministru Turizmu, Komérsiu no Indústria (MTKI), José Lucas do Carmo da Silva, tesi hela fita ba kampu Futebol iha Aldei Lacu-uma, Suku Baha-Mori, Postu Administrativu Venilale. Foto Suplay

Tempotimor (Dili)-Ministru Turizmu, Komérsiu no Indústria (MTKI), José Lucas do Carmo da Silva, inaugura kampun futeból iha Aldei Lacu-uma, Suku Baha-Mori, Postu Administrativu Venilale, Munisípiu Baukau.

Tuir informasaun ne’ebé www.tempotimor.com, asesu iha pájina MTKI, tersa (23/08) katak, kampu futeból ne’e hetan ajudu husi Ministru MTKI, bazei ba preokupasaun Juventude Aldeia Laku-uma ninian ne’ebé hato'o direta ba Ministru MTKI iha fulan hirak liu ba.

Iha inaugurasaun nee Ministru Turizmu Komérsiu no Indústria, José Lucas do Carmo da Silva husu komunidade sira liliu Juventude sira atu utiliza kampu ne’e ho di’ak nune’e bele hametin talentu Juventude nian hahú husi Aldeia to’o Nasionál.

“Ha’u hakarak husu ba juventude sira iha Aldeia Laku-uma atu ita-boot sira utiliza kampu ida-ne’e, nune’e iha futuru bele produz jogadór ne’ebé di’ak iha Aldeia ne’e bele ba to’o iha nível Nasionál”, dehan Ministru José Lucas.

Kampu ne’e hetan inaugurasaun tanba liuhusi Juventude, inan no aman, Autoridade lokaál sira-nia inisiativa rasik.

“Atu dehan ba komunidade sira hotu iha fatin ida-ne’e katak kampu ne’e ohin ita inaugura tanba ita-boot sira-nia inisiativa rasik, inisiativa ne’ebé mai husi Juventude, inan aman no autoriadade lokál sira”, dehan nia.

Administradór Postu Administrativu Venilale, Miguel Mendes hatete, Governo fó tulun ba juventude sira iha área remota atu oinsé bele halibur juventude sira-nia talentu ne’ebé di’ak ba futuru.

“Atu dehan de’it katak, Oitavu Governu Konstitusionál fó tulun Juventude sira liuhusi kampu ne’e atu nune’e bele hametin liután Juventude sira-nia talentu liuhusi área desportu”, dehan nia.

Reprezenta Komunidade Laku-uma, Francisco ho matan been hodi hato'o agradesemento ba Ministru José Lucas ne’ebé bele hakat to’o ona iha Aldeia Laku-uma, tanba durante ne’e laiha membru Governu ida hakat to’o iha Aldeia refere.

“Ha’u ho laran triste tebes hodi agradese ba na’i-Ministru ne’ebé bele hakat to’o iha ami-nia Aldeia, tanba hahú husi okupasaun Indonézia to’o mai Timor-Leste ukun-an laiha Ministru ida mak to’o iha ami-nia aldeia foin primera ves ami simu ministru MTKI iha ami-nia Aldeia”, deklara Francisco.

Iha inaugurasaun ne’e Ministru mós oferese farda no bola ba juventude Laku-uma no hafoin inaugurasaun kontinua diálogu entre komunidade ho Ministru José Lucas do Carmo da Silva relasiona ho preokupasaun komunidade nian. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items