“Primeiru, mandatu CDTL nian ita haree ba mós problema sira ne'ebé mak dezeintendimentu internál federasaun sira-nian. Hanesan temi basket ho tenis meza ne'e ami notifika ona parte balun”, dehan nia hafoin audénsia ho PR Horta iha Palásiu Prezidensiál, Bairo Pite, kuarta (22/06).

Bazeia ba levantamentu dadus sira ne'ebé mak ekipa juridiku CDTL rekolla husi federasaun Basket Bola no Tenis Meza, ne'e dadus iha ona, tanba ne'e notifika ona atubele hadi’a liña koordenasaun ne'ebé mak di'ak hodi intende malu haree ba organizasaun nia interese inklui lori juventude sira ne’ebé mak iha talentu ba basket bola no tenis meza.

Nune'e Konfederasaun Timor-Leste deside sei hala'o mós diagnóstiku ba funsionamentu Federasaun Desportu hamutuk 35 ne'ebé afilia ba Konfoderasaun Desportu iha Timor-Leste no ida-ne’e sei foku liuba programa sede sira ba federasaun desportiva sira.

Tanba bazeia ba regra kona-ba atu rejista iha Ministériu Justisa, kada federasaun tenke iha mapamentu ba sede, no ida-ne'e mak objetivu CDTL nian hodi forma hela ekipa ne’ebé halo hela servisu diagnóstika ba federasaun sira ne'ebé mak afiliadu ba konfederasaun internasionál ne'ebé mak kondisaun seidauk iha.

“La’ós kondisaun sira de'it ita mós sei haree ba aspetu sira seluk ne'ebé mak dezenvolve iha sira-nia organizasaun federasaun rasik, sira iha atleta ka la’e, sira iha treinadór ne'ebé kualifikadu ka la'e, la’ós fatin de'it mais rekursu ne'ebé federasaun iha, ita halo hotu diagnóstika para hodi hetan ida ne'ebé mak prioridade, rekomenda ba Governu hodi ajuda sira-nia dezenvolvimentu iha Timor-Leste”, hatete nia. (*)