“Primeiru Ministri mós fó parabéns mai ha'u, hanesan ita-boot sira hatene iha sábadu ami kongresu Federasaun Futeboll Timor-Leste nian ha'u eleitu filafali hanesan Prezidente, nia mós kongratula dehan katak, kontinua servisu tanba nia presiza duni atu realiza buat ne'ebé mak Governu mós mehi, públiku mós mehi, nomós entidade hothotu  ne'ebé mehi, ba halo oinsá mellora profesionalizmu iha Federasaun Futeboll Timor-Leste ita-nia jogadores sira, ita-nia estrutura sira inklui infrastrutura ne'ebé sei hein hela nia solusaun ikus”, dehan Ministru Francisco Jeronimo, hafoin hasoru malu ho PM Taur iha Rezidénsia Farol, segunda (28/02).

Iha mós eprezenta Fédération Internationale de Football Association (FIFA) ne'ebé mai iha Timor hasoru ona ekipa FFTL, no hasoru mós ho Sekretáriu Estadu Joventude no Desportu (SEJD) hodi diskute prosesu sira ba futuru.

Tanba FIFA presiza dokumentu ofisiál husi parte Governu nian, ho Federasaun atubele kompleta, ba administrasaun atubele implementa projetu boot sira ne'ebé mak halo iha Timor liliu kona-ba kampu futebol.

“Ba ha'u toman tiha ona servisu durante tinan rua, tolu ne'ebé ha'u fahe servisu bainhira ha'u iha Governu tuku 8 to'o 12 oras, ha'u iha fiderasaun 12 oras to'o tuku 2:00, tuku 2 ha'u mai fali Governu, tuku 5 ha'u ba fali ne'ebá to'o 6, tuku 7 mak ha'u fila, ne'ebé ha'u toman tiha ona servisu ida ne'e, e ha'u fahe servisu atu servisu ne'e ho di'ak nune'e fó atensaun buat ne'ebé baibain ha'u halo iha ne'e’, esplika nia.

Nune’e bele mellora atividade desportu la bele haree iha parte ida de'it, tenke haree parte hothotu, tanba ne’e hakarak atu envolve munisípiu sira hotu iha prosesu ne'e.

“Ita boot sira haree agora jogadór nasionál sira horisehik foin fila husi Kombodia mai ho 3 lugar. Selesaun ida ne'e la'ós, foti iha Dili de'it, ne'e munisípiu tama hotu, jogadór husi Likisá, Ermera, Baukau, Suai no Ermera mós iha, ita komesa envolve”, ainforma nia.

Federasaun Futebol Timor-Leste la bele dehan de'it mak Dili, maibé nia tenke Timor tomak ne'e, atubele to'o iha munisípiu sira hodi dezenvolve no foti jeresaun foun sira ne'ebé iha talentu di'ak. Tanba ne’e, integra iha formasaun ba selesaun nasionál nian.

“Ida ne'e mak ami halo e mellora mós estrutura sira iha baze atu sira bele servisu ho di'ak, e iha kooperasaun di'ak ho parte Estadu”, dehan nia. (*)