Tempotimor (Covalima)-Ministru Asuntu Parlamentar no Komunikasaun Sosiál (MAPKomS), Francisco Martins da Costa Pereira  Jerónimo, lansa Programa Naroman ba Suku iha suku Dato-Tolu, Postu Administrativu Fohorem, Munisípiu Covalima.

“Programa Naroman ba Suku ne'e, primeiru sei fasilita komunidade no joven sira liuhusi kapasitasaun iha área jornalizmu oinsá sira bele kobre potensialidade ne’ebé suku iha hanesan agrikultura, turizmu no rekursu importante seluk”, dehan Ministru Francisco iha suku Dato-Tolu, Postu Administrativu Fohorem, Munisípiu Covalima, kinta (5/08).

Tanba Governu nia programa ne'e lori ba povu nia leet, hodi rona povu nia hakarak, atu hatene komúnidade sira-nia preokupasaun, rona saida mak komunidade sira hakarak aprezenta ba governu.

Tuir planu governu iha povu nia leet ho Programa Naroman ba Suku, no hili suku sira ne'ebé hela iha área remota.

“Atu nune'e motiva ita-nia komunidade sira motiva ita-nia populasaun ida atu sente labele izoladu, atu nune'e dezenvolvimentu ne'ebé la'o dadaun ne'e mós bele hakat to’o iha sira-nia fatin, tanba ne'e ita lori Programa Naroman ba Suku mai iha Dato-Tolu”, afirma Ministru.

Tanba ida ne'e meius ne'ebé mak governu hakarak halo, nune'e hakbesik-an ba povu nomós povu bele koñese no hahú intende malu oinsá mak bele dezenvolve rai ida ne'e liliu saida mak bele akontese iha suku Dato-Tolu.

“Programa ida ne'e ki'ikoan ida ne'ebé mak ami bele halo ba ita-boot sira ida ne'e buat ki’ik ida ne'ebé ami halo ba ita-boot sira, ami hein katak ida ho ki’ik ne'e tau hamutuk no loron ida sei sai boot”, hatete nia.

Xefe Suku Dato-Tolu, João Agostinho Resi, sente orgullu ho programa Governu nia tanba bele hasai suku husi izoladu no tama iha suku dezenvolvimentu.

“Hodi komúnidade datoluk nia naran hato'o agradese uain tebes ba programa Oitavo Governu nia ne'e, tanba suku ida ne'e uluk okupasaun Indonézia to’o mai ukun-an ema temi hanesan suku mais izoladu iha Munisípiu Covalima”, dehan nia.

Partisipa iha atividade lansamentu ne'e, Administradór Postu Administrativu Fohorem, Prezidente TATOLI,ip, ekipa TIC, Komadante Eskuadra PNTL Fohorem, Diretór Planeamentu no Diretór DNDI, asesór MAPKomS, Xefe suku, Xefe Aldeia, Komúnidade no entidade relevante sira seluk. (*)