Tuir komandante PNTL Munisípiu Covalima, Superentendente Polísia António Maria de Sá katak, Covalima hahú hikas serka sanitária ba loron 16, tanba ne'e husu ba komunidade Covalima atu hakmatek iha ida-idak nia rezidénsia.
"Covalima komesa ohin hahú fali lockdown ka serka sanitária, ne'ebé ami husu komunidade Covalima kumpri regras hanesan uluk, iha fulan kotuk, bainhira sa'e motor labele ema na'in rua tenki ema ida de'it, nafatin uza maskra fase liman ho sabaun nafatin distansiamentu sosiál metru ida, hodi nune'e prevene moras Covid19," dehan Komandante António ba www.tempotimor.com iha nia knaar fatin, Kinta (15/4).
Komandante ne'e mós husu ba estudante sira ne'ebé husi kapitál Dili tama ba Covalima, labele ba uluk uma, maibé tenke aprezenta aan uluk ba saúde, tanba kazu aumenta ne'e impaktu husi estudante sira ne'ebé mai husi Dili.
"Husu ba inan-aman sira karik oan sira ne'ebé mak mai husi kapitál Dili labele mai uluk uma, haruka sira ba entrega aan ba parte saude iha karantina ka entrega aan ba eskuadra PNTL Covalima hodi nune'e entrega ba saúde sira hodi kumpri regras no teste swap hodi hatudu rezultadu positivu ho negativu, tanba ne'e husu dala ida tan ba inan-aman sira labele subar oan sira ne'ebé mak mai husi Dili," informa Nia.
Entertantu Munisipiu Covalima dadaun ne'e kazu pozitivu hamutuk 32 inklui estudante sira ne'ebé fila husi Dili ba Covalima kontinua aumenta iha karantina bairro kosta suai.(*)