Iha atividade distribuisaun hahán bázika ba familia kbi’it laek ne’e, lia-na’in husi uma lisan Lai Tua, Lamberto de Araújo hatete, apoiu ba família kbi'it laek uma-ka’in lima iha aldeia Meop no Holba, suku Labarai, tanba afeta husi serka sanitária no estadu emerjénsia.
"Ha’u-nia labarik sira iha Dili, telefone mai ha’u katak, fahe direta labele tanba situasaun serka sanitária iha Dili, entaun labele halo movimentu, tanba ne'e ha’u mak sira-nia katuas adat entaun reprezenta sira-nia oin hodi ba haree família balun ne'ebé mak iha aldeia Meop no Holba ne’ebé afeta husi serka sanitária no estadu emerjénsia mak laiha kbi’it, entaun ita koordena ho autoriedade lokál sira para apoiu buat ruma ne’ebé ita iha, depois apoiu ne’e mós ita la haree ba kór ka família”, dehan Lamberto ba www.tempotimor.com iha suku Labarai, segunda (29/03).
Ai-han hirak ne’e apoiu husi Covalimaoan sira ne’ebé hela iha Dili inklui iha munisípiu liuliu sira ne’ebé hola parte husi uma lisan Lai Tua.
"Apoiu ne'e mai husi família uma lisan Lai Tula Holba husi Dili no iha Covalima hamutuk mak ajuda ita-nia família kbi'it laek sira, tanba agora tempu zejum ne'ebé fó domin ba malu liuhusi buat ki'ik sira ne'e”, hateten nia.
Iha situasaun hanesan, reprezentante família kbi'it laek, Liberata Marçal ho mata-been agradese ba apoiu husi família sira, tanba durante serka sanitária no estadu emerjésnia ne’e fó impaktu duni ba família inklui labarik sira.
"Ha’u agradese tebes ba família ida ne'e no tiun maun alin sira, tanba ha’u iha oan na’in-neen no ha’u-nia apa kondisaun difisiente, ne'ebé ha’u kbi'it laiha duni, ne'ebé ha’u kontente no agradese tebes ba sira," Liberata espresa ho mata-been.
Entertantu família kbi’it laek sira ne’e uma-ka’in rua husi Aldeia Meop no uma-ka’in tolu husi Aldeia Holba no ai-han sira ne’ebé familiar husi uma lisan Lai Tula Holba apoiu mak hanesan fós, mina bimoli no supermi.(*)