Haree ba dalan ne'ebé laiha hodi difikulta membru sira husi UPFhodi asesu ba postu foun iha Wessei, mak komunidade ho inisiativa rasik hakara apoiu autoridade seguransa hodi loke dalan.

Haree ba inisiativa komunidade Besiuk ne'e, Komandante Patrollamentu Unidade (UPF) Inspetór Polísia João Baptista Ferreira, husi kompañia bravo Covalima sei fó prioridade ba atividade loke dalan ba postu permanente Wessei ne'e, tanba kuaze kilomentru 19 husi aldeia We'etaba to'o área Wessei.

Hafoin komunidade sira hari’i postu vizilánsia iha área Wessei, iha tempu badak parte UPF sei hamutuk ho komunidade sira iha suku Beiseuk no Lalawa Postu Administrativu Tilomar hodi loke estrada ba to'o postu vizilánsia refere.

"Kona-ba estrda foun ne'ebé atu loke ne'e, xefe aldeia We'etaba no Lalawa ko'alia ona katak sei hamutuk ho ekipa F-FDTL no UPF sei loke dalan tradisionál hodi nune'e motorista sira bele asesu ba postu foun ne'e, tanba distánsia ne'ebé dook tebes, entaun xefe aldeia ho nia komunidade prontu hodi servisu iha tempu badak”, dehan Inspetór João ba www.tempotimor.com, kuarta (23/03).

Alende ne'e xefe aldeia We'etaba suku Biseuk José Nunes, kompreomete katak sei hamutuk ho komunidade hodi tulun forsa sira atu loke dalan ba postu foun ne'ebé hari’i ona iha pontu entreda ilegál ne'e.

"Ha'u orgullu tebes tanba ita-nia seguransa sira hari’i postu vizilánsia iha fatin ne'ebé movimentu ilegál buras iha Wessei, tanba ne'e tempu badak ha'u ho komunidade sei ajuda loke estrda husi We'etaba mai to'o fatin Wessei ne'e”, dehan nia.

Entertantu iha loron sábadu no domingu foin lalais ne'e juventude ho komunidade sira husi suku Biseuk no Lalawa fó ona apoiu hodi hari’i uma ba postu vizilánsia ida iha área Wessei atu fasilita servisu UPF kompaña bravo ho ekiipa. (*)