Apoiu finanseira hamutuk orsamentu US$3500.00 ne'ebé fó husi SEKoop mak membru kooperativa sira utiliza hodi sosa mákina atu ajuda fasilita sira bele fila rai no kuda produtu.

Prezidente kooperativa WEMOOK, Ináçio Cardoso informa, orsamentu ne'ebé apoiu husi SEKOOP, balu utiliza ona sosa mákina fila rai nian hodi kuda ai-farina, batar.

"Ho osan ne'ebé fé ne'e mak ha'u sosa ona hand traktor ho montante US$2700.00. Mákina ne'e ami uza hodi fila rai hodi kuda modo”, dehan Prezidente kooperativa Wemook, Ináçio Cardoso ba jornalista www.tempotimor.com iha via telefone, tersa (23/03).

Maske proposta ne'ebé hato'o ba SEKOOP la temi kona-ba husu osan atu sosa mákina, maibé tanba situasaun obriga tenke sosa duni tratór hodi ajuda fila rai.

"Ami-nia grupu ne'e, ami agora hala'o hela atividade kuda batar nian, balu kolleta ona, maibé ho situasaun ladun di'ak, tanba ular han hotu, entaun to'o agora preparasaun filafali atu kuda fali batar ho foremungu”, afirma nia.

Ho situasaun serka sanitária ne'ebé governu aplika iha Covalima, rezulta membru sira limita tama servisu hodi kumpri regra distansiamentu sosial no fíziku.

"Tanba dehan ema labele halibur ema barak, entaun agora ami halo servisu mais, ami fahe, balu tama, no sira baku deskansa. Iha grupu balu ami membru fahe oituan-oituan hodi servisu”, hatete nia.

Dadaun ne'e sira konstrui hela uma ida iha toos laran, atu membru sira bele tau material grupu nian, inklui hadi'a mós bee-matan balu ne'ebé lokaliza besik iha toos, atu kanaliza ba toos laran, nune'e bele uza fali ba rega produsaun.

"Sim, ai-farina ami kuda ladun barak, balu panen ona, maibe balu seidauk”, haktenik nia.

Entretantu, kooperativa Wemook hari'i husi membru hamutuk na'in-25, no toos ne'ebé oras ne'e sira hala'o atividade ba, ho nia luan kauze ektare tolu, ne'ebé lokaliza iha Suku Kasabauk, Postu Administrativu Tilomar, Munisípiu Covalima.(*)