Iha loron dahuluk ne'ebé administradór foun hala'o nia servisu ne'e hahú hasoru malu ho diretór, xefe departamentu inklui funsionáriu administrativu munisípiu Covalima nian.
Administrador foun Fransisco de Andrade husu ba funsionáriu liña ministeriál sira atu ne'ebé iha munisípiu Covalima atu servisu hamutuk hodi dezenvolve rai Covalima.
"Iha era demokrásia ita sai lidér, ita sai xefe, la'óss atu sai liurai, maibé atu serbi povu no sai atan ba povu Covalima. Hanesan mós diretór sira iha liña ministériu sira hotu la'ós atu manda de'it iha fatin, maibé sai diretór atu servi rai ida ne'e, tanba ne'e persiza servisu hamutuk," dehan Administrator Francisco liuhusi nia diskursu ba diretór no funsionáriu sira iha Covalima, Tersa (23/3).
Nia afirma, atu lori Covalima ba oin persiza kolaborasaun iha servisu, la'ós adminitradór munisípiu Covalima mesak, maibé servisu ekipa hodi dezenvolve rai Covalima.
"Tuir ema nia aiknanoik ida ko'alia hanesan ne'e, kuandu kesak ida labele dasa foer maibé kuandu kesak futu hamutuk bele dasa foer, ne'e signifika presiza ita hotu servisu hamutuk," dehan Nia.
Administradór foun ne'e mós promete iha nia lideransa la haree ba kor ka rasa no sei la halo diskriminasaun iha Covalima, maibé sei haree tuir ema ida-idak nia kapasidade ne'ebé mak iha no servisu ho fuan ba Covalima oan hotu.(*)
