Komandante UPF kompaña Bravo Inspetór Polísia, João Baptista Ferreira hatete, problema ne'ebé enfrenta iha terenu estrada laiha no tenke la'o ain husi Wetaba to'o Wessei.

"Ita iha problema mak estrada laiha ne'ebé husi Wetaba sa'e mai to'o Wessei kuaze kilomentru 16 la'o ain de'it, entaun ha'u iha planu ba oin atu hadi'a dalan husi Wetaba mai post Wessei postu observasaun tau iha sentru entre Walalama Tilomar hodi hamenus movimentu ilegal”, dehan Komandante ne'e ba www.tempotimor.com iha Wessei, domingu (21/03).

Bainhira seguransa sira halo servisu ka vizilánsia iha postu refere tenke kuru bee mota hodi tein iha tempu udan, maibé iha tempu bailoron bee laiha.

Maibé, baliza entre Wessei ho Indonézia metru 30 de'it ka mota mak hafahe.

"Husi ohin ba postu ne'e destakadu ekipa na'in-haat, seguransa permanente iha postu Wessei refere. Entaun sira ne'ebé agora destakadu iha postu observasaun Wessei ne'e ajente xefe Polísia Hermenegildo Leite ho nia membru na'in-tolu komesa ba oin permanente ona iha ne'e”, dehan nia.

Bainhira la’o husi kompaña mai postu permanente Wessei tenke leba de'it ai-han, ho duransaun semana ida ona.

"Ho limitassun oioin, ho esfosrsu duni, hodi tau ekipa UPF na'in-haat iha fatin refere hodi hamenus movimentu ilegál. Depois sa'e ba Tilomar nia área kuaze kilomentru haat, mais estrada mak ladi'ak maibé tanba kna’ar ne'e importante entaun tenke obriga membru na'in-haat destaka mai iha ne'e”, afirma nia.

Entretantu postu observasaun ne'ebé estabelese ona mak iha Wessei, postu iha Wala-lama, Maubise parte Tilomar, Postu Anin-matan Fatumea no iha planu atu hari’i mós iha postu fronteira hanesan Fatululik, Maukatar iha sentru ilegál.(*)