Tuir Administradór Munisípiu Covalima, Afonso Nogueira Nahak katak, autoridade lokál sira iha munisípiu Covalima, iha responsabilidade boot oinsa atu mobiliza populasaun hodi hola parte iha programa vasinasaun atu bele proteze ka hasa'e imunizasaun povu nian hodi hasoru moras Covid-19.

"Iha tempu badak programa ne'e sei realiza, tanba ne'e ita bolu autoridade lokál sira iha postu sira liu-liu xefe suku sira hodi mai rona informasaun direta husi ekipa nasionál sira atu nune'e mobiliza povu Covalima iha parte vasinasaun nian," dehan Administratór Afonso ba www.tempotimor.com, Sesta (19/3).

Iha biban hanesan xefe sub-komisaun ba program vasina Covid-19 nian, Mislisa Vital dehan, programa vasinasaun sei prioridade dahuluk ba iha munisipiu sira ne'ebé risku ba moras Covid-19 inklui Covalima.

"Programa vasina ne'e ita haree ba munisípiu ne'ebé mak afeitadu ba moras covid-19 hanesan iha munisípiu Covalima, Bobonaru no Baucau, entaun ita-nia transmite uluk informasaun ba xefe suku sira, depois mak xefe suku sira ba hatutan ba povu sira iha ida-idak nia suku," nia informa.

Entertantu iha divulgasaun informasaun ne'e partisipa husi Administradór Munisípiu Covalima, adminiatradór husi postu administrativu hitu hanesan Fatumea, Fohorem, Fatululik, Zumalai, Maukatar, Suai Vila, no Tilomar, inklui xefe suku 30 ne'ebé hola parte iha munisipiu Covalima.(*)