Hafoin simu primeira votu ne'e, amu selebrante Donatos de Jesus Marçal husi omília konsidera dalan ne'ebé irmã Natalia Rosário de Oliveira no irmã Justina Fernandes hili importante tebes tanba atu servi sarani sira liuhusi dalan tuir Kristu nian.

"Nafatin fiar ba Maromak ne'ebé hatudu dalan ba imi na'in-rua, ne'ebé ohin imi na'in-rua simu ona primeira votu atu sai bibi-atan Maromak nian”, dehan Donatos liuhusi omília bainhira prezide misa iha Parókia Nossa Senhora do Carmo-Zumalai, sesta (19/03).

Madre Supriora husi Ordo Carmelita husu ba madre na'in-rua ne'e atu kontinua serbi sarani ho aten barani hodi la'o tuir Kristu nia dutrina.

"Buat ne'ebé imi na'in-rua mehi no família tomak nia apoiu ba imi na'in-rua mak kontinua la'o tuir dalan Maromak nian”, hateten nia

Nune’e mós madre Justina Fernandes ne'ebé foin simu primeira votu agradese ba família no sarani hotu ne'ebé apoiu to'o ohin loron.

"Ha'u-nia agrdese no hakuak boot ba madre superior, amu sira hotu, alin akolitu sira no família sira tomak ne'ebé suporta tomak ba ha'u no ohin loron marka prezensa iha ne'e”, dehan madre Justina.

madre Justina Fernandes moris iha suku liurai iha loron 27 fulan-novembru tinan 1994, oan husi David Fernandes no inan Dau Bais de Jesus. Madre Justina oan daruak husi maun-alin na'in-ualu husi munisípiu Aileu ne'ebé pertense ba parókia São Pedro São Paulo Aileu.

Madre Justina Fernandes hahú eskola primária iha eskola Númeru 0 Rai-Rema iha tinan 2005-2010, kontinua eskola pre-sekundária no sekundária iha Colegio São Pedro São Paulo Aileu iha tinan 2011-2016.

Hafoin remata estudu, iha fulan-janeiru 2017 madre Justina Fernandes tama aspirantado iha Beilaco, hafoin fulan-jullu tinan 2017 tama postulantado Beilaco, iha fulan-janeiru tinan 2019 simu primeira novisia no fulan-fevreiru tinan 2020 simu segundu novisia iha Hera.

Entertantu madre Natalia Rosário de Oliveira moris iha suku Madabenu, Postu Administrativu Remexiu, munisípiu Aileu iha loron 23 fulan-dezembru tinan 1994 husi aman João de Oliveira no inan Rosantina do Rosário no oan datoluk husi maun-alin na'in-sia.

Madre Natalia Rosário de Oliveira hahú nia estudu iha eskola primária no pre-sekundária iha eskola Katólika São Miguel Arcanjo Besilau iha tinan 2001-2006, hafoin nia kontinua estudu iha eskola sekundária Colegio São Miguel Arcanjo Manufahi husi tinan 2011 to'o 2013.

Hafoin remata eskola iha sekundária, madre Natalia Rosário de Oliveira kontinua formasaun iha fulan-janeiru tinan 2017 tama aspirantadu iha Beilaco no fulan-jullu tinan 2017 kontinua postulantado iha Beilaco hafoin iha fulan-janeiru tinan 2019 simu premeira novisia iha Hera no loron 11 fulan-fevereiro tinan 2020 simu segundu novisia iha parokia São Fransisco Xavier Dare.(*)