Maske governu liuhusi Ministériu Saúde (MS) kontinua esforsu hodi kombate moras iha Timor-Leste, maibé moras Inspirasaun Respiratóriu Águdu (ISPA) númeru kontinua aumenta iha sentru saúde sira ne’ebé lokaliza iha área rurál.
"Iha ne'e moras númeru sa’e maka’as mak moras ISPA ne'ebé ami rejistu númeru husi ema ne’ebé mai konsulta husi tinan 2020 mai to'o marsu 2021, ami rejista hamutuk 604 no moras TBC hamutuk na’in neen. Maibé moras ISPA afeta ba labarik minoridade ka husi tinan 15 mai kraik, tanba klima”, dehan Domingos ba www.tempotimor.com iha nia kna’ar ar fatin Salele, kinta (18/03).
Moras ISPA númeru aas duni, maibé laiha ema ida mak lakon vida husi moras refere, tanba komunidade sira mai halo konsultasaun no husi ekipa saúde Tilomar fó ai-moruk bazeia ba moras ne'ebé iha.
"Moras Ispa númeru aas maibé parte saúde Tilomar seidauk simu informasaun ruma husi autoridade lokál no komunidade sira katak ema lakon vida tan Ispa hanesan mós moras TBC durante ne’e rejista na’in-ualu, maibé na’in-neen mak rekopera ona, na’in-rua seluk sei iha hela tratamentu saúde”, afirma nia.
Entertantu informasaun ne’ebé www.tempotimor.com asesu rekolla katak, ai-moruk hodi atende moras Ispa, TBC no moras seluk tan iha sentru saúde Tilomar sufisiénte.
Alende ne’e profesionál saúde sira ne'ebé servisu iha postu saudé Salele hamutuk na’in-16 kompostu husi xefe sentru saúde, doutór na’in-ida, enfermeiru na’in-lima, parteira na’in-rua, médiku na’in-ida no tékniku laboratóriu na’in-ida inklui voluntáriu sira.(*)