Negosiante Agustino Mendonça (35) iha merkadu suai sente kontente tebes, tanba durante serka sanitária ema laiha movimentu no laiha vizita ba merkadu suai hodi hola sasán iha kios, maibé agora komesa la’o normal fali.

"Ha’u kontenti tebes, tanba durante moras Covid-19 iha governu hamosu tan serka sanitária iha munisipiu Covalima ema laiha atu mai hola ami-nia sasán, ne'ebé loron osan tama laiha osan sai mak iha, dalaruma loron ida ami hetan de’it mak U$10 resin, maibé komesa agora liuhusi ne'e, ema komesa mai merkadu fali, karreta mós bele halai fali ona”, dehan nia ba www.tempotimor.com iha merkadu Suai, segunda (15/3).

Motorista (Ojek) Almerio Berre (26) mós sente kontenti tanba durante la halo movimentu hodi buka osan impaktu husi serka sanitária, maibé agora komesa bele tula ema, só kontinua kumpri regra Organizasaun Mundiál Saúde (OMS) no Ministériu Saúde (OMS) nian hanesan uza maskra, fase liman no disténsia sosiál.

"Ágora ami sente di’ak oitoan ona tanba ami bele halai ka hein ema iha ami nia pankala iha merkadu suai ne'e, la’e ami mak ojek atu hetan osan husi ne'ebé, ne'ebé durante serka sanitária ne'e ami araska tebes hetan osan hodi hola fós no sustenta ba ami-nia família uma laran, maibé agora ami bele halo movimentu hodi buka osan”, informa nia.

Tuir observasaun jornalista iha terrenu nota katak, dadaun ne’e situasaun munisípiu Covalima komesa la’o normal no postu administrativu Fatumea mak sei aplika serka sanitária.(*)