Maske Governu Timor-Leste durante ne’e gasta ona osan husi fundu petrolíferu liu U$ billaun 10, maibé kondisuan estraga kontinua aat liuliu estrada ne’ebé liga husi postu adminitrativu ba munisípiu sira.
Administradór munisípiu Kovalima, Afonso Nahak hatete, kondisaun estrada husi postu administrativu Fatumea difikulta transporte sira atubele tula nesesidade bazika, iha tempu udan.
"Horikalan administradór postu Fatumea liuhusi via telefone katak, estrada sa'e ba Fatumea agora pior liu, karreta ne'ebé uza trasaun mós labele ba Fatumea, atu lori fós ne'e sa'e ba karik haree klima lai, tanba agora tempu udan, ne'ebé haree bailoron mak tula fós sa'e ba Fatumea”, konta nia ba www.tempotimor.com iha nia kna’ar fatin, kinta (11/03).
Komandante Sentru Integradu Jestaun Krize (SIJK) munisípiu Kovalima, Tanenti John da Costa Steves, rekoñese kondisaun estrada ba Fatumea grave duni iha tempu udan.
"Ha’u mós haree rasik kondisaun estrada postu Fatumea, agora aumenta grave tan de'it, karreta ki'ik uza trasaun mós labele, tanba ne'e atu distribui fós ne'e sa'e ba karik haree kondisaun klima, tanba horseik udan loron tomak”, informa nia.
Maibé, ekipa SIJK munisípiu Kovalima hala'o hela enkontru hodi diskute hela prosesu distribuisaun fós ba komunidade afetadu sira, nomós kona-ba médida sira ne'ebé komunidade kontinua implementa medida preventiva mezmu munisípiu Kovalima livre ona husi serka sanitária.(*)