Tuir xefe aldeia Traduk-ama, suku Nanu, Fransisko da Silva (42) katak, komunidade husi nasaun viziñu Indonésia parte Laktutus nian mai na'ok hotu komunidade Timoroan sira-nia aihan iha to'os laran no sasan seluk.
"Sira husi Indonésia parte Laktutus mai kalan ho loron mai na'ok hotu sasan iha ha'u-nia komunidade sira nia to'os laran mak hanesan kinur, banin, maek no sasan seluk tan," dehan xefe aldeia ne'e ba www.tempotimor.com liuhusi via telefone, Sábadu (6/3).
Nia afirma, komunidade hotu iha postu Fatumea sai ladi'ak, tanba serka sanitária hela, entaun komunidade sira abandona hotu sira-nia to'os no animál sira, entaun parte autoriedade lokál mós informa ona kestaun ne'e ba parte seguransa liu-liu Polísia Nasionál Timor-Leste.
"Komunidade hotu hakmatek iha ida-idak nia uma, tanba ne'e komunidade sira iha aldeia ne'e balun seidauk revista sira-nia to'os laran, tanba serka sanitária hela entaun sai ba mai ladi'ak hotu," Nia informa.
Entertantu relasiona ho serka sanitária ne'e, xefe aldeia ne'e husu ba parte seguransa ati halo patrollamentu másimu iha fronteira, nune'é sira sorin labele tama mai livre, hodi aproveira komunidade nia sasan iha to'os laran no animál sira.
Alende ne'e, aldeia Traduk-ama hola parte iha suku Nanu postu Fatumea, munisípiu Covalima. To'o notisia ne'e públika, www.tempotimor.com seidauk komfirma ho parte PNTL Munisípiu Covalima, Antônio Maria de Sá, tanba okupadu ho servisu.(*)