Tuir Komandante PNTL munisípiu Covalima, Superintendente Antônio Maria de Sá katak, sinais tranzitu ne'ebe taka iha suku Ogues besik auto estrada, hetan estragus husi ema deskoñesidu sira iha Sábadu kalan semana kotuk.
"Iha loron sábadu kalan udan boot ne’e, grupu deskoñesidu estraga no soe tiha sinais tranzitu (rambu-rambu) iha parte suku Ogues postu administrativu Maucatar, besik auto estarda ne’e ba mota laran. Entaun hakarak apela ba komunidade sira katak, aktu ida hanesan ne'e krime no husi parte seguransa munisípiu kontinua buka tuir autór sira ne'ebé halo buat hanesan ne'e," dehan Superintendente Antônio ba www.tempotimor.com iha nia knaar fatin, Tersa (2/3).
Nia mós konsidera ba aktu individuál ka grupu ne’e la’ós hanesan timoroan, ma’ibé hatudu aktu hanesan traidór.
"Iha situasaun ida hanesan povu infrenta ba vida mate nian, maibé grupu no individuál balun halo nia jeitu hanesan ne'e, sira sobu sinais ne'ebé mak transitu sira taka, se de’it mak komete ba hahalok hanesan ne'e ami kaer sei lá tolera ba nia," Nia hateten.
Entertantu observasaun www.tempotimor.com iha terrenu nota katak, oras ne'e polísia tránzitu Covalima taka dalan uza besi, roda no bidon iha estarda diresaun ba postu Maukatar no Fatululik.(*)