Tuir koordenadór kipa servisu munisípiu Covalima Vitória ho Domin-20 (EKSES COVID-20) Martinho Gusmão Alves katak, ekipa halo solidariedade ida ne’e tanba haree ba infesaun Covid-19 ba maluk sira iha Covalima, entaun ekipa COVID-20 apoiu foos saku 200 ba maluk Covalima oan sira.

"Apoiu ne'e faze primeiru, ne’ebé ami ohin lori uluk foos saka 200 mai munisípiu Covalima, atu distribui ba komunidade sira ne’ebé afeita iha postu administrativu Fatumea. Depois apoiu baluk sei iha Dili, entaun tempu badak sei mai to’o Suai," dehan koordenadór COVID-20 www.tempotimor.com ohin, Tersa (2/3).

Nia afirma, apoiu iha etapa dahuluk ne’e sei distribui ba postu Fatumea ho Tilomar. Depois etapa tuir mi sei distribui mós ba postu seluk ne’ebé hola parte iha Covalima.

Tuir nia, ekipa servisu COVID-20 ne’e hola parte husi estudante no intelektuál Covalima oan sira ne’ebé iha kapitál Dili, liuhusi kontribuisaun inklui apoiu husi emprezáriu balun mak ohin konsege lori ona apoiu ne’e mai Covalima, liu-liu ajuda ba postu Fatumea no Tilomar.

Entertantu observasaun www.temptimor.com iha terrenu nota katak, transporte husi Dili mai para iha baliza Ainaru ho Covalima, depois mak kareta husi Suai ba foti iha baliza ho Munisípiu Ainaru hodi lori mai Covalima.(*)