Tuir Direktur servisu hospital referal Suai José Moniz Perreira katak, parte ospital referal halo asaun ne'e hodi prevene transmisaun lokál covid-19 iha munisipiu Covalima liu-liu da'et ba pasiente sira ne'ebé moras komplikadu.

"Vizitante mai labele liu ema na'in ida, tenki ema ida mak tama hodi hein pasiente, nune'é ami bele kontrola. Depois sidadaun sira tama mai ospital tenki tuir regras hanesan máskara, tenki iha distansiamentu sosiál, nune'é prevene transmisaun lokál ba surtu ba surtu ne'e," dehan José ba www.tempotimor.com iha nia knaar fatin Suai, Kinta (25/2).

Nia afirma, virus ne'ebé iha ona trasmisaun lokál ne'e, di'ak liu mak prevene kedas, duké númeru pasiente covid-19 nian aumenta bei-beik.

"Objetivu limitasaun ba familia ne'ebé hein pasiente ne'e mak liga ba kazu transmisaun lokál ne'ebé mosu ona, tanba ne'e tenki tuir protokolu Organizasaun Mundiál ba Saúde (OMS ) nian, hodi nune'é prevene da'et Covid-19 iha munisipiu Covalima," katak Nia.

Alende ne'e, parte Ospitál Referál Suai mós fó ona orientasaun ba pesoál saúde sira ne'ebé servisu iha ospitál refere atu uza ho uniforme, nune'e aumenta tan frekuénsia dezinfekta nian iha areadores Ospitál nian.

Entertantu observasaun www.tempotimor.com iha terenu nota katak, movimentu komunidade nian iha área Ospitál Referál Suai komesa menus.(*)