Ministra Odete ba www.tempotimor.com dehan, vizita ba Ospital Referál Suai ne’e atu haree projetu konstrusaun sala izolamentu nomós laboratóriu ba moras pandemia Covid-19.
"Objetivu loloos ha’u mai iha Covalima ne’e, mai haree direta prosesu konstrusaun sala izolamentu ne’ebé konstroi iha Suai vila, laboratóriu inklui ICU Room inklui haree mós fasilidade ba moras Covid-19," informa MS ba www.tempotimor.com iha Ospital Suai, Horseik (21/02).
Governantes ne’e esplika, vizita ne’e haree mós kondisaun ORS nian hodi nune’e, oinsa kontinua halo manutensaun inklui atu kompleta tan fasilidade iha ospital ne'e rasik,
"Ha’u vizita ba dala rua ona, dala uluk ha’u vizita iha tinan kotuk, ne’ebé mai haree katak, Ospital Suai buat balu falta, maibé agora ita haree mudansa buat balu ona, ne'ebé ita espera katak nei-neik ita bele responde buat hotu," nia informa.
Sala izolamentu ne’ebé konstroi husi kompañia lokál Roman Junior Unipesoál Lda ho totál orsamentu $262.452.00 ne'e konsege atinje ona pursentu 35%, ne’ebé kompostu husi sala haat no haris fatin ualu. Alende ne’e, laboratóriu ne’ebé konstroi husi kompañia Manu-Bey Unipesoál Lda ho totál orsamentu $70.747.68, ne’e atinje ona pursentu 13% kompostu husi sala tolu no haris fatin ida. Entretantu, seluk husi projeitu rua ne’e iha mós konstrusaun ba ICU Room ne’ebé responsabiliza husi komapñia Giovanio Unipesoál Lda ho valór orsamentu $189.959.69.
Entertantu, governante ne’e mos vizita uluk ba postu Administrativu Fatumea, munisípiu Covalima hodi haree ekipa saúde ne'ebé halo hela teste masál ba komunidade suku tolu iha postu refere ne'ebe jeografikamente baliza ho nasaun viziñu Indonézia.(*)
