Tuir Xefe pontu entrada Salele Humberto Yohanes katak, sidadaun na'in rua ne'e hetan deportasaun tamba sira-nia pasaporte mate, entaun sira mai ho dokumentu travel nian.

"Sidadaun timoroan oan na'in rua ne'e eskola iha Indonézia Universidade Únika iha Kupang, ne'ebé ohin husi Indonézia deporta fila fali mai, tanba sira-nia pasaporte mate," dehan Humberto iha nia knaar fatin, pontu entrada Tilomar, Salele, Sábadu (20/2).

Nia akresenta, bainhira sidadaun na'in ne'e to'o iha pontu entrada Salele nian, ekipa Ambulansia transporta kedas sira ba karantina no hasai kedas sira-nia amostra hodi halo teste, maibé sidadaun na'in rua ne'e negativu Covid-19.

"Sidadaun na'in rua ne'e mane ho naran inisiál ERX (26) husi Munisípiu Ainaro parte Manutasi no sidadaun feto ho naran inisiál NDC (26) ne'e husi Postu Administrativu Fohorem, munisípiu Covalima," Dehan Nia.

Sidadaun timoroan nain rua, mak deporta husi Indonezia ne'e nu'udar estudante finalista ne'ebé durante ne'e hala'o sira nia estudu iha universidade Únika kupang-Indonézia.

Entretantu observasaun www.tempotimor.com terenu nota katak, sidadaun na'in rua ne'e tama iha pontu entrada Salele maizumenus tuku 11:25 otl, no hetan kedan atendementu husi equipa servisu saúde postu entrada Tilomar no halo kedas disinfekta.(*)